操盤手札記 - 割柑人 2019年7月16日
【操盤手劄記】對抗垃圾的迷思 - 割柑人
綠色動力A股6月尾一周炒升六成，較其H股炒高幾倍。其H股現價PE為12.7倍，估值偏低。互聯網圖片 適中字型 較大字型
據《金融時報》爆料，特首林鄭月娥多次請辭，但被北京拒絕，要佢留低收拾爛攤子；不過，特首辦回應：「林太從無辭職。」如果香港係一間公司，市民係股東，CEO就要聽民意；可惜，股東有股票，市民無選票。要挽管治狂瀾，唯有重啟政改！
「反送中」示威浪接浪，衝擊投資情緒。周一，中國公佈次季GDP增6.2%，創27年低，但符預期，港股反覆收升0.3%。恒指連續三日挑戰上周一下跌裂口不果，繼續喺前浪底27985至下跌裂口頂28714之間爭持。本周美股季績開鑼，成為後市風險。
除咗香港，近日武漢陽邏亦爆發示威，反對興建垃圾焚化發電廠，汙染環境。自6月28日起，過萬民眾連日上街抗議，當局出動武警鎮壓，民眾被毆至頭破血流；7月5日深夜，更出動解放軍開坦克車進駐，同時使出白色恐怖手段，挨家拍門威逼就範。
興建焚化爐引發示威，中國時有發生。中國係全球最多垃圾嘅國家，自1998年第一座焚化爐喺深圳啟動，焚燒成為處理垃圾嘅主要模式。垃圾問題嚴重，習總視為治國要務，一方面提升垃圾焚化汙染控制標準，另一方面建立垃圾分類回收系統。6月4日，官媒全以《習近平對垃圾分類工作作出重要指示》作為頭條。7月1日，上海成為中國第一個實行垃圾強制分類嘅城市。中國股市向來跟政策走，呢排就見垃圾相關股票熱炒。港股之中，垃圾發電股有光大國際（257）、綠色動力環保（1330）等。
綠色動力係A＋H股，該股A股6月尾一周炒升六成，公司要發通告澄清業務不涉前期收集垃圾或分類，又提醒其A股已較其H股炒高幾倍。不過，該股始終係受政策支持嘅增長股，首季多賺18.6%，其H股現價PE為12.7倍，估值偏低。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com