真心真話 - 汪敦敬 2019年7月24日
【財經專訪】汪敦敬：市道有危就有機
適中字型 較大字型
從事經紀三十多年、身兼地監局委員多年的祥益地產創辦人汪敦敬，在新界西北區雄霸地產代理界。對於挖角、挑釁、黑社會掃場，他見盡不少；對他來說，市道有危、就有機。
見盡挑釁及黑社會掃場
回憶80年代初，汪敦敬已搞地產代理行，「識老婆（當年女友）第一年已經買樓，跟住生意唔好又賣返。每次買樓都係諗住攞嚟結婚，每次危機都賣樓。」浮浮沉沉，到89年六四後，「老婆問我過唔過美國，話嗰邊好多親戚……我覺得危就係機，所以每次worst time都好興奮。每次市道唔好就係創業機會，幾乎每次淡市都開分行。投資、做生意，識得脫離群眾，機會就好多」。
到90年初期，大行殺入屯門，猶如「六大派圍攻光明頂」，出現挖角、挑釁及黑社會掃場，如今笑著回憶（當日應該笑唔出吧？）「有苦有樂啦！好似今日喺祥益做清潔，聽日可以喺隔籬大行做分行經理，咁你認為佢真正身份係清潔定分行經理？呢個係當時嘅間諜戰。」
他續稱，「行家搵黑社會掃場，兩個龍虎鳳走入來問邊個老細，我話我係，個時仲覺得自己好打得，雖然跛咗腳。過到去兩圍新Ｘ安，咁我講道理囉！（淆底？）唔淆底，我嘅道理啱呀！我話：『你無通知喎！你通知咗，我咪咩囉！』我都幾串㗎。其實呢啲係行家搞鬼。」
去年樓市受累中美貿易戰，樓市急挫，他撰文叫人買嘉湖山莊，「個時面對好多指摘：『仲叫人買樓？』有啲儲緊錢嘅人，會好憎我。話有無搞錯，我儲緊錢，你喺度唱好，我想佢跌到400萬呀嘛。」
「倒返轉，好多時谷底我都慣性話畀人聽，好多人唔信。無辦法，我哋係偏見中成長，得一種方法可以攞返公眾對經紀嘅信任，就係講老實說話同時間印證。」他每次發表文章，幾乎都被鍵盤戰士以「汪汪」、「汪狗」等侮辱，他說：「我唔care囉！」
真心真話 - 汪敦敬 舊文
來源 source: http://hk.finance.appledaily.com