金手指 - 孫柏文 2019年7月30日
【金手指】我至愛的金礦股 - 孫柏文
金礦股Polyus喺倫敦同莫斯科兩地上市，係間俄羅斯公司。
資料圖片 適中字型 較大字型
上周孫柏文曾講過金銀走勢幾勁，應承咗大家今日分享我至喜愛嘅金礦股。睇咗全球所有金礦股，我覺得要揀一間，最好買嘅就係倫敦同莫斯科兩地上市嘅Polyus。
論市盈率、產能、生產成本、產量增幅、派息等，全部贏香港上市及其他外國嘅金礦股幾條街。「點解有咁大隻蛤乸？」原因係佢係間俄羅斯公司。啲人先驚俄羅斯產權保護不足，最大鑊係揸超過八成股權嘅大股東，甩唔到美帝制裁嘅威脅。
其他投資者一見，嚇死。不過你睇得本欄，就算冇跟買，都應該有留意俄鋁（486）對上年半嘅事。知道美帝制裁，就係有危先有大機。
講到俄鋁，佢哋幾日後開特別股東會講拆遷，由澤西島拆番俄羅斯新成立嘅特區。俄鋁亦宣佈會下周開董事局會議，傾半年業績。上周公佈嘅第二季營運數據好靚，希望宣佈中期業績時，喺派息上唔會令我哋呢啲小股東失望。如果派得少過2017中期，咁我哋就真係會嬲爆。
最後，禮拜日晚都唔知邊個蛋散寫埋啲話特首林鄭會因病辭職嘅短訊，仲暗示話港澳辦記者會宣佈。搞到廣傳，令香港進入嗰種等六合彩金多寶開嘅狀態。即落注後，未攪珠前，集體發夢中咗會點。𠵱家唔中，大家好夢落空，唔好俾我知係邊個，一定媽叉佢。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com