大棋局 - Mr. Tregunter 2019年7月30日
【大棋局】勿讓子彈再飛 - Mr. Tregunter
當權者明知情勢有惡化趨向而不處理，從目前的情況推測，估計他們正在等待時機。 資料圖片 適中字型 較大字型
面對特殊情勢之際無為，有三種可能性：蠢、被架空、等待時機。自百萬人上街遊行反惡法，林鄭政府選擇龜縮不作為，有可能是蠢，有可能是被架空，但連國務院出來發言姿態都繼續無為，那就不是蠢和被架空的問題。
情勢令人憂慮處，是任誰都明白現下不去處理問題，無論示威者定警方，互相對立之情緒只會上唔會落。原因在，香港係國際都會，係食四方飯之地，係金融中心，係共產黨權貴小金庫，係列國利益龍盤虎踞所在。喺咁樣一個地方，玩鎮壓，要鎮壓到何種地步？難道要六四事件重演？如果唔會出現六四事件，示威者今日俾你打穿頭，聽日縫完針仍然會上街表達不滿。
中美貿易戰進入最後協議階段，一旦中國簽署進貢條款，將要面對外滙流失問題。因此香港仍然有為中國籌措資金、錢貨進出之用，並不會出現殺雞取卵情況，起碼現階段不至於。正因如此，中央會顧忌輸血管道是否暢通。如此則容易讓一種想法抬頭，如果今日可以讓，到明日大嶼各類基建籌旗，有人反對係咪要讓。若這種想法冒起，態度就會壓倒是非黑白。
當權者等待時機
本來香港人好易管，風球都大把人趕返工，最緊要有股有樓炒，食好嘢，馬照跑，舞照跳。元朗白衣黑社會恐襲事件，觸及香港沉默大多數底線，觸及人類道德底線。原居民師奶，一婦當關站在整群警隊面前怒罵警察；銀髮長者，單人匹馬步向武裝警隊斥喝。不要再講只係年輕人反對政府，要衰到乜嘢地步先會令全城人民義憤填膺。原本政府做錯事引發的問題，自己不面對，詐詐帝引導去執法部門同人民之間的對峙，然後縮喺後面話支持警方執法。
無為，從好方面看，無論政府如何譴責示威者暴力，現時任你講到盡，最多也只係衝擊佔領立法會，所謂暴力在共產黨眼中得啖笑。情勢屬可控範圍，故不急於冷卻。若從壞方面看，明知情勢有惡化趨向而不處理，那同蓄養民氣無異。加上貿易戰進入最後協議階段，中央政府對直接出面幹涉有顧忌。上述三者都關係到一個問題，就係時機。
一國兩制之設計，係要嚟收買台灣。此方針一日未變，枱面上一國一制不會提前出現。明年台灣總統大選，處理香港問題不能過份。
不能過份就要軟性處理，否則只會越來越多人上街，但又不軟性處理。有良知嘅人係時候企出嚟。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com