智取大市 - 晉佳 2019年7月8日
【智取大市】內房巨企變豬對手 - 晉佳
碧桂園舊年資本化利息相當於稅前盈利26%，加上連環地盤意外，引致建築安全成本增加，變相令利潤率收窄。 互聯網圖片 適中字型 較大字型
上期講到新城控股（1030）盤數好驚嚇，面對董事長被捕情況下，可能有存續危機。
早喺本欄3月尾寫恒大（3333）之時，就講到利息資本化利疊利，加上限價令每年只容許最多半成加價空間，令到盤數過份進取嘅大型內房股半癱瘓一段時間，恒大係典型例子。至於碧桂園（2007）舊年放棄三四五線城市都有項目嘅全覆蓋策略，其實並唔係驚大陸樓市爆煲，而係全身負債同持有項目多到令公司開始難以轉身，舊年資本化利息相當於稅前盈利26%未算嚴重，但面對連環地盤意外，令碧桂園要自我整改，建築安全成本增加，變相令利潤率收窄，再進取落去，有可能變下一間恒大。長遠令資產負債表輕身一點，先能避免賺錢用嚟畀息嘅惡性循環出現。
點樣令資產負債表輕身啲？當然係賣多啲樓、買少啲地，呢個守業過程唔知維持幾耐。去到今年初，仲有好多大型內房企業話要打守勢波，唔敢太進取，而一向算穩陣嘅中海外（688）、華潤置地（1109）就繼續穩陣落去。一批財務較健康或者銷售好嘅內房企業，面對豬一般又肥又論盡嘅對手，可以喺整體行業競爭減低嘅情況下擴充同跑出，呢個係世房（813）、時代中國（1233）、路勁（1098）走勢較佳嘅原因之一，趨勢相信會維持一段時間。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com