操盤手札記 - 割柑人 2019年8月13日
【操盤手劄記】內憂外患 反彈乏力 - 割柑人
內憂外患下，港股過去兩周累跌近2,500點，超賣仍反彈乏力，有機下試年初低位25000關。 資料圖片 適中字型 較大字型
繼721後，811再有地鐵恐襲！今次施襲嘅係警察！過去65日，反修例引發嘅集會、遊行、示威不下40次，林鄭政府漠視民意，一面放任警察血腥鎮壓，一面放任鄉黑招攬外援。林鄭嘅情況，猶如散戶唔肯止蝕，仲去加注，仲去借孖展溝貨！唔止蝕博翻身，係老散心態。不過，一般老散，如果股票勁蝕，都會睇下減持定清貨。林鄭面對市民五大訴求，本來應承兩項——撤回同徹查，已叫減持，降低風險。不過，林鄭從無檢討，錯過好多止蝕機會，只會輸鑊甘，老散都不如！
林鄭唔止蝕，市民就止蝕。市民對林鄭政府信心盡失，用腳投票，人唔走，錢都走。周一，唔少市民預約外資銀行開個可以global transfer嘅國際銀行戶口，將副身家抽離香港銀行體系。同日，醫護發起罷工、學生發起三罷，林鄭禍港不淺！過去一周，除咗街戰惡化，貿戰亦惡化。美國對中國開闢三條戰線：一、貿易戰，向中國貨追加關稅；二、貨幣戰，將中國列入滙率操縱國；三、科技戰，對華為、中興（763）等5間電訊設備公司落禁購令。特朗普更聲言未準備好達成協議。
眼見貿戰升級，人民幣棄守七算，各國央行爭相減息自保，一周就有五國，包括紐西蘭、印度、泰國、菲律賓、塞爾維亞。內憂外患，港股喺過去兩周累跌近2,500點後，周一再跌0.4%，收25824，超賣仍反彈乏力，有機下試年初低位25000關。
本欄上周提到，內地有流動性風險大嘅銀行黑名單，主要係東北、大西北、山東、天津嘅中小銀行，已爆鑊嘅有包商銀行、錦州銀行（416）、天津濱海農商銀行。話口未完，又爆一間，就係恒豐銀行，由山東省同滙金拯救。名單上仲有9間，內銀不宜沾手！
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com