魚樂無窮 - 唐牛 2019年8月13日
【魚樂無窮】追沽有乜好選擇 - 唐牛
恒生為本地概念股龍頭，收市價破底，或會掀起新一輪跌浪，進取的可考慮追沽。 資料圖片 適中字型 較大字型
港股昨日跌逾百點，有兩點值得留意。
第一，成交不足600億元，以每周第一個交易日來說，肯定係偏細，但香港困局越來越難解，不少戰友都無心戀戰，交投疲弱變得合情合理。第二，以去年底收市價25845點計，恒指今年終於見紅，換句話說，如果閣下倉位仍然係正數，恭喜你，你已經跑贏大市，假若同樣見紅的話，唯有加緊努力。
很多睇淡後市的戰友，都等待反彈市出擊開put，但指數在26000大關有明顯阻力，執筆之時期指再插水逾200點，或者又會令一眾未動手的淡友失望。在不同的平台都有提過，暫時睇唔到有乜利好因素令推高後市，壞消息卻是一籮籮。靠藍籌業績炒上？在如此疲弱的市底下，恐怕會失望而回。值得留意的是，恒生（011）及領展（823）兩隻本地概念股龍頭，以收市價齊齊破底，或會掀起新一輪跌浪，進取的可考慮追沽。
另一方面，黃金價格亦創多年新高，踢穿每盎斯1,500美元，在環球動盪形勢下，似乎有餘未盡，技術走勢上亦有望再抽高。想分一杯羹有乜好選擇？明晚理財急call節目會有專家教路，有興趣的戰友，記得準時睇直播！
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com