金手指 - 孫柏文 2019年8月13日
【金手指】走，都問心無愧 - 孫柏文
今次發生事件，應該係一次畀香港人清楚睇到自己前路點行。 資料圖片 適中字型 較大字型
2015年11月23日淩晨，孫柏文記得攰到瞓咗喺區選點票站對出嘅一張長椅。我當時參選，開票知輸咗。一名義工走埋來問我感受，我答：「盡咗力，講曬心底嘅說話。走，都問心無愧。香港為我做過嘅，今次後再冇拖冇欠。」
我又記得今轉六月第一次百萬人示威，外國傳媒訪問個企喺維園嘅後生仔。問佢示威希望會有咩成效。佢諗都唔使諗，就話：「唔會有。」咁記者再追問點解要走出來，佢答：「我要知自己已盡咗力。」
同大家一樣，我都唔知會點收科。更唔想諗後遺症會係乜。不過，今轉應該係一次畀大家香港人清楚睇到自己前路點行。
2017年，BBC電台搞咗個回歸廿年節目，請咗啲同香港有關嘅人上去傾嚇。當時我坐喺「聯滙之父」Greenwood 旁，話：「香港將會踏上黎巴嫩之路。」當時一講，俾主持人寸話「有冇咁誇張呀？」我補充話黎巴嫩曾經被譽為「中東巴黎」，中東最開放嘅金融中心。不過我話黎巴嫩人各散東西，都能保自己嘅本質。例如墨西哥首富，都係黎巴嫩裔人。
最後，當年科大成立廿五周年時，請咗我最欣賞嘅歷史學家Niall Ferguson做講者。我有去，當時問：「根據你本War of the World，只要出現帝國邊疆移動、唔同人種存在兼互相覺得對方比人不如、同埋經濟動盪，就會有大屠殺。香港出現緊呢啲症狀，咁香港會否出現呢？」
佢話唔會，因為香港人同大陸人係同一種人喎。
呢轉都應該係最唔黑天鵝嘅黑天鵝了。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com