魚樂無窮 - 唐牛 2019年8月1日
【魚樂無窮】8月睇一個因素 - 唐牛
8月港股後市，主要睇一個因素，就係香港困局何時解決。 資料圖片 適中字型 較大字型
知否世事常變，變幻原是永恒，天氣如是，政治如是，股市如是。突如其來的八號風球，令港股提早兩小時收市，成交卻較平日更多，反映沽壓不輕。中美貿易談判重啟之際，特朗普又玩嘢吹淡風，加上本港政局持續不穩，恒指收市終失守28000大關，7月埋單跌近800點。
執筆之時未知儲局議息結果，但減息0.25厘乃市場共識，反而焦點在於儲局對未來息口的展望，有下調憧憬就有得炒，口風偏鷹的話，位處新高的美股恐怕要調整。
展望8月，我最擔心的依然係香港困局，眼見示威遊行有增無減，警民衝突有升級冇降級，林鄭政府偶爾蒲頭譴責一輪後，便繼續玩龜縮，明顯沒有解決辦法，如此一來，撕裂問題只會越來越嚴重，最終肯定會在經濟層面反映。
事實上，近日本地概念股如地產股、REITs、零售股相繼倒下，沽壓最新已蔓延至本地銀行代表恒生（011），至於呢刻係咪撈底時候，已經唔係用基本因素計算，而係視乎你點睇問題何時解決。如果覺得好快搞掂，低吸良機就在眼前。但係咪真係咁樂觀？相信大家都十分清楚，講到呢度，你明我點解會進軍美股啦？
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com