小股東幫錢不幫親
2019年08月23日
美股雖然偏穩，但港股一輪反彈後又失速下墜，恒指收市回落221點。由於市場缺乏買意，若然無利好消息，個市可能又要尋底。
中環茶友昨日話題不是大公司，而是三線工業股震雄(057) 就是否應該私有化爆發家族爭拗。震雄主要做注塑機，
創業一代係工業家蔣震，但最為公眾熟悉應該係佢個女，即民建聯立法會議員、有「政壇元秋」之稱的蔣麗芸。今次傳出爭拗的版本，係負責公司業務的六女兒蔣麗苑想將公司私有化，之後轉型做地產，創辦人蔣震，以及其孻子、副主席蔣志堅就反對，認為要專注做番工業老本行。
震雄大股東捐股捉蟲
爭拗雙方各說各有理，從創業者兼本身做工業成名的蔣震角度，當然認為應該堅持原則，但現在負責打骰的蔣麗苑就覺得在商言商，工業老本行不易做，點解不改行做易賺錢的地產呢？本來生意係蔣震創辦，鍾意點做就可以點做，關鍵係老人家年紀大，又諗住回饋社會，於是將股權注入蔣震工業慈善基金，點知現在基金由蔣麗苑控制，咁就有可能要打官司搶控制權。自己創辦的生意自己有可能無法再話事，有茶友笑言，蔣老先生這次有點好心變捉蟲，搞到自己好頭痕。
對於公司應否私有化，蔣家有不同意見，「政壇元秋」認為，若然把公司私有化，就失去公司原先上市希望增加透明度原意。呢個說法其他小股東又點睇呢？持有公司幾個百分點的小股東、股壇長毛David Webb似乎最關心私有化價錢，話若然大股東想買起公司，最緊要就係講價錢。從小股東角度睇，買股係為了投資，而不是為了大股東有甚麼個人理想，所謂清官難審家庭事，最重要都係睇邊個方案回報高。
睇返震雄昨日收市價2.73元，微升2仙，市盈率19倍，股息率2.6厘。過去五年雖然有四年賺錢一年蝕錢，蝕錢的2016年度虧損達1.7億元，賺錢的四年合共都係賺2.7億元，可見做工業都係搵辛苦錢。據管理層講，去年賺錢主要係上半年，下半年開始受內地放緩影響，今年生意相當不明朗，以此估計19倍的市盈率絕對不易維持。公司其後話無私有化方案，升幅由最多升28仙即時收窄，反映小股東失望離場。
震雄股價2.73元，資產淨值有4.4元。蔣麗苑想將公司轉型搞地產，相信不會是買地起樓，而是把深圳廠地改建，這是近年很多廠家正路做法，所以公司價值應該更高。若然私有化，相信會比收市價有溢價，關鍵只係做唔做得成。若然大股東提出私有化，現時市場不乏相似高資產、低盈利工業股，小股東大可走多一轉。從公司角度，廠地今日不起樓，明日都可以起，未必需要心急，蔣老先生同蔣公子可能都係咁睇。從小股東角度，若然現在有機會高價套現，就可以另覓機會走多一轉。小股東通常幫錢不幫親，牌面睇就傾向蔣千金立場多一點，所以公司上得市，就要預了不能只看自己理想，不看自己控制權以及小股東福祉啦。
地產股再現壓力
震雄有私有化因素股價撐住，但大市就不一樣，恒指高開後曾升18點，其後受壓最多曾跌過292點，見25977點，創本周新低，收報26048點，跌221點；國指收報10122點，跌54點。大市成交784億元。
煤氣(003) 日前公佈業績，盈利下跌18.9%，遭多間投行降目標價，股價連日下挫，一度跌至15.58元，創一個月新低，收報15.62元，跌3.6%，控股公司恒地(012) 基礎盈利下跌52%，股價受壓，低見37元，收報37.55元，仍跌3.2%；同系恒發(097) 跌3%，報0.66元。其他本地地產股壓力重現，長實(1113) 收跌2%，報54.25元，有傳該集團旗下10間酒店要求員工放無薪假。
陸羽仁
金融High Tea - 陸羽仁 舊文
來源 source: http://hdfin.stheadline.com