智取大市 - 晉佳 2019年9月4日
【智取大市】長線投資趁低迷時 - 晉佳
如果估強國賭客始終會返嚟，濠賭股係唔錯嘅撈底選擇，話曬係優質周期板塊，估值平。 資料圖片 適中字型 較大字型
個股近期炒業績餘溫，究竟選擇喺市場氣氛低迷時趁低吸，定係等氣氛好啲先入市？如果係長線投資，當然係趁市況低迷時買好股，估值會有roll over效應，市況一浪低過一浪時，股價可能一浪高過一浪。長線投資永遠早買早享受，因為股票會每年幫你賺回報，但銀紙只係喺通縮時代先會升值，況且現時點睇都唔似快將走向通縮。
睇圖表發現，滬綜指超長線指標200月線，通常有極大支持力，包括2005年、2008年、2013年同2018年都試過跌至呢個水平附近，然後見底回升。滬綜指今年初反彈，一輪調整後，目前高過200月線14%，相信長遠上升空間遠高於下跌空間。中美貿戰打到甩肺，但雙方策略都係靠收稅再向國內減稅還富於民，以政治同經濟發展偏好去扶持某些產業，即係總有股票跑出，問題係，藥股、消費股升浪過後，估值高企下升勢持續？定係有其他板塊接力？
周期股係咪全無睇頭，未必，強國客近期遠離香港，估計拖累濠賭股中場生意，部份因素已反映。如果估強國賭客始終會返嚟，濠賭股係唔錯嘅撈底選擇，話曬係優質周期板塊，估值平，就有吸引力。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com