魚樂無窮 - 唐牛 2019年9月5日
【魚樂無窮】一個遲來的挾倉 - 唐牛
昨日的升市，絕對係挾淡倉，有蟹貨的朋友，要好好捉緊這道打開中的逃生門。 資料圖片 適中字型 較大字型
「明明隔晚美股喪跌，但新加坡港股黑期竟然有得升？」這是我昨日開市前的疑問。更奇怪的是，開市後指數越升越有，差不多逼近26000點，做直播時唯有勉強解釋為A股硬淨、臨近國慶有維穩盤雲雲。直至中午過後，真相終於大白︰有媒體率先報道，林鄭月娥將宣佈撤回逃犯條例修訂，其後消息開始廣泛流傳，帶動恒指由頭挾到尾，埋單怒升近千點，重上26500點水平，算是近來苦中的一點甜。
不過，這個由政府引發的浩劫，已重創香港元氣，撕裂問題有增無減，更何況林鄭的無能，令民怨轉移至警民關係身上，單單撤回肯定不能令香港回復舊觀。其實官員們個個高薪厚祿，飽讀詩書，一個早應落實的決定，竟然遲了三個月才拍板，唔通佢哋仲用緊56k上網？唔係點解可以慢咁多拍？
問題只是稍為紓緩而非真正解決，你知我知個單眼佬都知，是故眼前的升市，絕對係挾淡倉的後果，地產股、零售股及銀行股等本地概念股，全為淡友至愛，因此昨日挾上動力亦最強，動輒有一成升幅。要資金重新擁抱他們嗎？相信唔係一時三刻的事情，有蟹貨的朋友，要好好捉緊這道打開中的逃生門，博反彈亦要把握食糊的機會。
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com