異動空間 - 魏力 2020年1月13日
【異動空間】簽約是否出貨時候 - 魏力
中美本周將簽訂貿易協議。資料圖片 適中字型 較大字型
如無意外，中美本周會埋枱簽約，特朗普放風，次回合可以打到第四季大選後，意味就競選連任而言，佢已經收夠籌，份成績單已夠向選民交代。第二回合再傾係用來牽制大陸，一來不讓其再坐大，二來繼續袋關稅，傾落唔滿意，又可以話阿爺違反承諾，重新再加關稅。
簽約是否代表出貨？魏力就咁睇：過去年幾反口咁多次，輸到驚，不少資金唔動筆都唔敢入場，所以簽成可能再挾幾日，但之後臨近農曆年應該減貨獲利。2月開始主題係業績尋寶，指數悶但二三線旺，物管、飲食、體育用品、內房、手機等績優股要重點留意。
全球炒放水，假如今年好好彩，大陸經濟不再free-fall，甚至有起死回生之象，濠賭股是倉內必備。去年經濟咁難捱，博彩收入僅跌3.4%，反映行業剛需頗強，今年大機會轉角回升，大摩睇升3%，里昂最樂觀睇升9%，濠賭股可發揮其經營槓桿。
早幾年濠賭大旺，原因帶有走資功能，如今效能削弱，揀股就要睇基本因素。睇好銀娛（027）原因有三：一、路氹土地耗盡，目前三間在建賭場，兩間屬於銀娛，預計2020至22年分階段落成，有助提升市佔率；二、銀娛貴賓廳市佔率27%，如行業回升將最受惠；三、橫琴定位國際休閒旅遊島，而銀娛為目前唯一獲批土地的博企，先行者的優勢相當大。
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://hk.entertainment.appledaily.com