自從本港出現首宗高度懷疑感染新型冠狀病毒肺炎的個案，口罩價錢，隨即升到成百蚊。除咗需求大增，加上不少物流行業已經收爐，口罩貨源大幅減少，價錢自然飆升。然而，生
死攸關，好多市民幾多錢都照買，市面已出現斷貨情況。
在口罩需求大增下，日本有好多口罩生產商亦不斷OT，訂單突然比上周同期激增3倍，過年前都無得停手。有些朋友，立即動身飛去日本，買的不是面膜和零食，也不是人氣熱賣的燒棉花糖撻和流心焦糖曲奇，而係「吉篋來，Full篋返」的日本口罩。今年過年最受歡迎手信可能唔再係藍罐曲奇同金莎，而係日本空運到港的口罩。
昨日內地更發出「武漢封城」通牒，武漢市內公交、地鐵、輪渡、長途客運暫停運營，機場、火車站暫時關閉。無特殊原因，市民不要離開武漢。武漢市更實施「蒙面法」，要求市民在公共場所必須戴上口罩。若勸喻無效，可交公安處理。我們位於上海的分公司，近排亦已統計出武漢員工的名單，雖然公司無法強迫員工不要回老家過年，但卻要求他們過年後，強制性在家工作1-2個星期，才可正式上班。可想而知，疫情嚴重，絕不講笑。
2003年SARS，我們一起炒紅了3M。2019年自反送中至今，口罩需求比平時已經高好多，再加埋今次疫情一推，肯定攀升至前所未有的高峯。鼠年就到，今年唔需要再睇那些蘇相士、麥姐姐講甚麼鼠年運程，但憑目測及親身感受，就知道我們正面對天災兼人禍啦……香港的人禍，當然要「歸功」林鄭；而天災，有時都好難預測，就如SARS一樣，今次又係衰喺食野味，實質計落似乎近於人禍更多於天災呢。
文迪晞
mailto:heyadmen@gmail.com
廣告經綸 - 文廸晞 舊文
來源 source: http://hk.entertainment.appledaily.com