冰說聰明 - 青冰 2020年1月2日
【冰說聰明】體壇盛事受惠股 - 青冰
2020年有兩件體壇盛事舉行，其中一件是東京奧運會。資料圖片 適中字型 較大字型
踏入2020年，先祝戰友們事事平安順利，回報更勝去年。年頭難免要預測嚇今年看好的板塊，近期見到勢頭唔錯的有內房及資源股，不過這些股跟內地經濟息息相關，萬一貿易戰再生變卦，坐得耐都難免驚驚。2020年有兩件體壇盛事舉行，分別是東京奧運會及歐洲國家盃，兩者都在夏季舉行，係時候搵定概念股喇。
作為體育用品股，戰友自然會想起李寧（2331）及安踏（2020），兩者去年皆是倍升股，不過在12月卻逆市下挫，有散水的味道，以佢哋的估值，業績唔容許有少許差池，但只要戰友眼光放遠啲，其實仍有很多選擇。雖然盛事在夏季舉行，但其實Nike及Adidas已經先行一步，Nike上月創出歷史新高，Adidas距歷史高位亦只欠3%。
體育用品上遊股升到爆，或者係時候吼返代工股，裕元（551）及申洲（2313）都是當中龍頭，裕元做鞋、申洲做衫，論身份地位，申洲貴為藍籌，估值自然較高，去年升28%，跑贏30幾隻成份股，而裕元這隻舊藍籌，息率逾6厘，市盈率只是申洲的一半，有re-rating的可能性。
裕元的客仔來自國際客戶，包括Nike、Adidas、Reebok及Puma等等，無論運動員來自咩國家，著咩品牌的運動鞋，好大機會都出自裕元。貿易戰關稅令內地工業艱苦經營，裕元也受影響，不過按半年業績披露，超過八成鞋類付運量都是來自越南及印尼，國內只餘13%，可見管理層有早著先鞭的眼光。
牌面上看的確唔錯，但戰友不要期望，可以有上遊股的爆炸性升幅，話曬都係工業股而已，不過裕元去年共動用9,513萬元回購，出手位在20.4元至22元，現價只係高過回購價4%，加上有6厘息墊底，所以值博率頗高，現時大行普遍的評級都是持有或中性，下個破位催化劑，可能就是大行吹奏吧。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.entertainment.appledaily.com