智取大市 - 晉佳 2020年1月6日
【智取大市】當新手問「買乜股好」 - 晉佳
投資要有成績，首先是搵到適合自己操作方式，先了解自己投資目標。 資料圖片 適中字型 較大字型
近日散戶指數似乎偏高，有同事連環問小弟「買乜股好」，被老手問呢個問題，往往可以答得輕鬆，被新手問呢個問題，先至係最難答得對方滿意。
美團（3690）？升咗啦喎。領展（823）？唔使你講都知。申洲（2313）？太大隻啦。周期股升得多唔好買住？我想知有乜可以即刻買喎。唔同情況要有唔同策略？有冇得冇咁複雜。真係講到一個number出嚟，又再問「有冇多個number比較？」
新手們期望有個新奇刺激又準又一定即刻可以買、好快有得贏、又低入場費嘅答案，最好仲要係一個專欄內不能講嘅內幕故事，當有呢個故事嘅時候，又最好聽得舒舒服服，唔使經大腦消化。
新手未必有充足準備去handle「買乜股好」呢個問題，或許要先明白兩件事。第一件事係，操作永遠要靠自己，一個number背後，要有啱嘅買入價、沽貨策略，震又沽唔沽？唔鬱又沽唔沽？升得快又加唔加、食唔食？自己有幾大信心去揸得耐……。要贏一隻股票贏得耐贏得多，以上咁多個訴求可謂缺一不可，關關都要克服，操作並非叫你買、叫你賣咁簡單，買入後往往要不停review。真係要逐樣解釋畀你聽？閣下又可能會嫌麻煩，倒不如先搵適合自己嘅操作方式，先了解自己投資目標。
第二件事，篇幅有限，下期再講。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com