笑到最後 - 高明 2020年1月6日
【笑到最後】除夕呃嬲抽獎的迷思 - 高明
政府除夕搞大抽獎，本來想送禮企圖為社會矛盾降溫，但安排出事，倒數一刻全城鬧爆。 互聯網圖片 適中字型 較大字型
去年底政府除夕搞大抽獎，本來想送禮企圖為社會矛盾降溫，但整個安排出事，倒數一刻全城鬧爆。成件事犯咗以下錯誤：
一、即場登記冇作用
炒股票或者賭波走地盤，價格盤口會有變動，所以才要即場。然而，抽獎來來去去都是同一堆獎品，即場並沒有作用，政府用幾個鐘頭處理過百萬人的登記，等同要過百萬人30分鐘內散去一樣，除了呃嬲，沒有別的作用。
二、抽獎流程不合常理
正如大家經歷過的大小聯歡會抽獎一樣，你不會到抽獎的一刻才查詢自己有沒有資格抽獎，實際上一早已知，公司春茗做夠若幹月的員工有資格、蛇齋餅糭團有買飛就靠票尾抽獎，是個超簡單的概念。炒股開戶到買股票也總有個流程，今天9:30想交易，不可能同時在9:30開戶及買股票。
三、買賣雙方皆冇經驗互不熟悉
如果是港交所（388）或馬會處理大量request及突發的高流量，應該問題不大，因為賣方日日做，買方亦知整個流程，不會一彈app便打電話問。全民大抽獎來得即興，而抽的市民又是第一次，大家都沒有經驗，然後要幾個鐘學識並成功登記。本來攤長來做應冇問題，偏偏要玩即時。
次次派錢派禮都出事，因為旅發局承襲了政府對市民的不信任：我又要搞抽獎、又唔信你人在香港，所以block外國IP、一定當時要網絡身在香港才可抽。可以想像，當日開會搞抽獎，與會者第一時間不是討論如何令香港人開心過年，而是「點防止啲唔喺香港嘅人抽」。
為何誠哥派錢能贏盡掌聲、政府不能？一個信字，冇，就係冇。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.entertainment.appledaily.com