中美第一階段貿易協議最重要一點，係冇違約罰則及仲裁機制，或言此為美方讓步，非也。
事實上反映今次係一條不平等條約，因為簽約雙方地位
對等，先至會有仲裁機制，讓雙方都可興訟。其次，有違約罰則即有數計，冇違約罰則條數點計，由其中一方說了算，而今次協議係美方說了算。
白宮貿易顧問納瓦羅講得好清晰，今次貿易協議允許美國單方面判定中國有冇毀約。如美國墨西哥貿易協議，有問題兩國都可拗數，係雙邊機制；中美貿易協議，由美國判定中國有冇走數，係單邊機制。即係叫你做就做，冇討價還價餘地。取而代之為雙方協商，有問題時先由副部長、副總理、貿易代表等層層上推處理，90日內裁定，若美方認為中方失當可以祭出合比例回應，包括重徵關稅，中方承諾不報復。
協議有幾辣，具體睇一睇條款。比如第1章關於保護知識產權的1.35條，寫明協議生效30個工作日內，中國將頒佈加強知識產權保護計劃；第3章關於奶類產品的2（b）條，寫明協議生效10日內，美國奶類產品的安全系統最少同中國的奶類安全系統同級，即中國唔可以再以此阻礙美國奶類產品入口中國；關於豬肉產品的第2條，寫明協議生效10個工作日內，中國要批準經美國農業部食品安全檢疫處檢查的豬肉產品進口。
美元萬劍歸宗
大部份條款都寫明日子，叫你幾多日之內搞掂佢。過去中國所玩的貿易關卡手段，拖，此招已玩完；話大家制度唔同，唔係唔畀入口，而係要按有中國特色的審批規則，又玩完。美股近日強勢即反映協議內容，中國市場缺口終於被打開，唔再係得個講字。至於中長線，協議可以維持幾耐，市場情緒係到時先算，炒咗今轉先。
承諾只對君子有效，中國人太聰明，好早就知道君子可欺以其方。美國並非不明白，只係過去對中國隻眼開隻眼閉。中國已經富強，美國認為你係時候找數，無可能要著數時話自己開發中國家，講條件時就話自己世界第二大經濟體，今次係篤住中國嚟做。
協議簽署後特朗普表示有2,500億美元會回流美國，原理上也就是美元萬劍歸宗。所以貿易協議還有一點，就係中國承諾不貶值人民幣，同時定期披露外滙存底數據。
再次強調，貿易戰一大重要作用為釜底抽薪，中國用錢買兩年時間，可預期兩年後會有更大的事。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.entertainment.appledaily.com