買開、揸開黃金白銀嘅人，歷年來都應該會係本欄嘅fan屎。咁多年來，孫柏文都耐不耐提嚇大家，黃金白銀要爆升，一定
要買嘅人唔係出於貪婪，而係因為恐懼。
恐懼，你感受到嗎？
當然，香港仲有好多醒目仔話：「人死，唔等於市跌。資產市場有阿爺頂住，邊會有恐懼。」日日都有人批評強國政府，特別係啲外國傳媒。不過點解佢哋忽然對《華爾街日報》嗰篇題為「中國是真．東亞病夫」嘅文章咁大反應呢？
佢哋話係因為「種族歧視」喎。咁我當然走去望嚇篇文，一睇，就即時明白點解大陸要咁大反應。原來撰稿嗰個，唔係講中國人係病夫，亦唔係講中國係病夫。而係講緊大陸嘅銀行系統。
我上周寫咗篇題為「立刻沽清股票」嘅文，唔知你有冇做到。不過當全球都要實施「小區管理」時，啲嘢停曬，你估全球銀行呆壞賬百分比會點？黃金不斷有錢流入，歐元、日圓計，都已創歷史新高。美元計則多年新高。白銀一如既往，等緊你上車。
不過根據歷史無數次嘅經驗，一但白銀開車，就會一嘢超越黃金升幅。所以一注獨贏買白銀！
當然，講咗十幾年都要再提大家。買金銀，一定要買實貨。原因係你買任何衍生工具，例如ETF、紙金、紙銀都有邊個受你注，佢唔掂執笠、走佬嘅風險。大家要保護自己，保護財富呀。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com