面對疫情，中國正陷入進退兩難局面。疫情未退減，用官方的話係拐點未出現，但全國多地停工，經濟癱瘓問題已浮
現。過去30年中國作為世界工廠，全球對中國供應鏈依賴日深，中國停工，外國亦要諗計另求貨源。如此時間一拖得耐，客戶好易一去冇回頭，全球對中國呢個世界工廠依賴性減低，疫情過後中國要面對一波經濟打擊。
所以中共要求部份地方復工，但有機會醞釀第二波疫情爆發，到時更難搞。疫情已相繼在意大利、南韓、伊朗爆發，德國柏林夏里特醫院病毒研究所所長Christian Drosten認為，肺炎疫情全球大流行不可避免。內地鄭州大學人民醫院臨床醫學系副主任醫師王梅雲的團隊研究指，無病徵者亦可傳染武漢肺炎，預防感染面臨挑戰。
中國經濟的債務問題本身已積壓沉重，疫情爆發可謂恰逢其時踩多腳。然而債務＋疫情衍生另一個問題，比如海航有報道指會出售資產畀內地其他航空公司，如同拆骨；北大方正債務瀕違約，被法院頒令重整，結局通常係股權結構洗牌。根據國情頗大機會出現企業陸陸續續被黨掌控。
恐引來第二波爆發
民間方面，武漢肺炎仍存有太多未知數，重症率、死亡率未掌握，冇疫苗可用，加速研發亦無法即時投入應用。由於太多未知數，人們容易恐慌，政府宣佈緊急狀態來規管人的行為便顯得理所當然。霍布斯的《利維坦》，全書有一個重點，就係帶出人會因應情勢，而取捨對自由的追求程度。內地部份地方人民被禁足，若不復工，隨之而來隨時係物資配給，街上由所謂的紅袖章管理秩序，如果唔講你知係新聞，以為睇緊紀錄片。
對於疫情，樂觀看法認為入夏後會逐漸退減，不樂觀看法認為，現階段復工會引來第二波爆發。如果疫情入夏後退減，內地第一季積壓的需求會提振一輪內需經濟增長。1666年倫敦大瘟疫過後，人民對衞生、防疫的訴求大增，英國人的衞生意識大為提高，中國相信亦會一樣。
如果復工引來第二波爆發，中國經濟當然仆直，但情勢會驅使共產黨之集權力度越來越大，對社會資源的掌控越來越大。但今次和60年前不同，時代已經轉變。60年前國人係戰亂後卑微求存，60年後國人係溫飽後要有保障。萬一中共誤判，走入回頭路，結局相信係不得不改革以回應人民訴求。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.entertainment.appledaily.com