【大茶飯】停市比急挫更大鑊（青冰）
【大茶飯】停市比急挫更大鑊（青冰）
如果疫情在往後不受控，再傳停市的話，殺傷力肯定比GDP負增長更大。更多
環球金融市場今年本來有個唔錯的開局，貿易戰首階段完結，中國經濟亦初見觸底，中概股又話排隊返香港上市，美國企業盈利繼續交到數，指數再創新高，所以去年
底訪問各大市場人士，大家都憧憬今年股市向旺。
但究竟今次肺炎咁大鑊，事前有冇人預計得到呢？青冰相信國內定必掌握有關資訊，只係消息上達至那個層面而已，與其亂估就唔花時間研究了。外資持續流入A股的勢頭一直持續，直至農曆新年前最後幾日，武漢封關後，滬深股通春節關門前，才見大量流走近百億元人仔，照咁睇今次老外都係中伏的，而且撤退得不夠徹底，不過要減低A股風險，仍可從港股市場作對沖，或在新加坡交易所沽A50的期指，上周每天都有交易，二月A50期指整周累跌7.8%，成交接近100萬張。
沒法套現慘過輸錢
上周接獲戰友通報，話A股可能延遲開市，青冰亦是半信半疑，信者因為深知國內真係大鑊，大部分企業都延長春節假期，騰訊（700）下星期一先返工，阿里巴巴（9988）今星期就在家辦公，中央旨意都係叫大家唔好周圍走，減低病毒擴散，所以有傳延遲開市，都情有可原；疑者就是現時A股已貴為MSCI及富時指數的成員，絕不能輕易話停就停，當初被納入前，最大的絆腳石就是A股公司隨便停牌，無規無矩，如果停市的話相信兩大指數公司必然震怒，仲話想增加A股在指數內的比重，睇怕要等多三五七年喇。
投資者當然怕跌怕輸錢，但更怕的就是沒法套現，如果疫情在往後不受控，再傳停市的話，殺傷力肯定比GDP負增長更大，因為後者最後可以放水補數，市場對你開放的信心冇咗，不是短期可以救得返，你睇當年熔斷，及往後的走勢便可知一二。
青冰
http://www.fb.com/chingbing888
本欄逢周二刊出
大茶飯 - 青冰 舊文
來源 source: http://hk.finance.yahoo.com