新正頭都未過，拜年已經唔講「恭喜發財」，只問「夠唔夠口罩用」。武漢肺炎疫情已擴散全國，以至全球22
國。15國已對中國落閘，港府拖延全面封關，一個字：廢！
香港成為「準疫埠」，旅遊、航空、酒店、餐飲、零售等行業首當其衝，相關股份冇運行；可惜香港冇口罩股，否則必成逆市奇葩。日本口罩股川本（Kawamoto，TYO 3604）嘅股價，1月累升7.3倍，單計對上兩周已升5.4倍，本周一始獲利回吐。
噚日內地復市，央行預早推出30項抗疫救市措施，又逆回購放水萬二億；中證監亦漏夜向券商下令禁止借貨沽空，場面如同2015年暴力救市。咁大陣仗，卻股滙雙殺。滬股瀉7.7%，收2747；人民幣跌穿七算，在岸低見7.0121，離岸低見7.0123。
港股跌勢暫見喘定，回升0.2%，收26356。恒指由1月20日高位29174，跌至噚日低位26145，9個交易日累跌3,029點或10.4%，同2003年沙士初段跌幅9.8%相若。不過，疫情未見頂，大市未見底，26000關弱雞，可能下試周線圖大雙底24500水平。
疫情嚴峻，無論大陸定香港，冇口罩戴唔敢出街。「宅」喺屋企有乜搞作，上網、打機囉！大和指出，疫情有利提供網上購物、網上遊戲嘅公司，該行首選阿里巴巴（9988）同騰訊（700）。兩隻股份，噚日分別逆市飆升2.3%同1.9%。滙豐環球研究則指出，按敏感性盈利分析，騰訊手遊收入增長每提高5個百分點，可提升每股盈利1%；每提高10個百分點，可提升3%。據內媒講，騰訊手遊《王者榮耀》春節使用量再創新高。事實上，阿里、騰訊都係5G應用股，不妨候低買啲責倉。
割柑人
本欄逢周二刊出
操盤手札記 - 割柑人 舊文
來源 source: http://hk.entertainment.appledaily.com