普羅大眾肯定對於未來幾個月感到絕望，投資者呢？港股由29000點跌到26000點附近，近3日反彈過千點，聽得最多嘅係「黐線，
有乜理由升？」或許去到大家覺得反彈市合理嗰陣，先係反彈市完結之時。
呢一刻繼續維持港股大型上落市預測，恒指喪挾後，未來幾日估計玩輪流反彈，支撐大市嘅潛在利好消息包括內地復工、周末日可能降準等。有貨不妨等一下，去到下周先吼位減持，再等未來兩個月壞消息重現之時低吸，因為疫情幾可肯定惡化，信心會再動搖。
大部份人以沙士作為參考，但呢次肺炎令中國唔少行業同地區陷於短期癱瘓，情況更似2011年3月日本大地震。參考當年上半場，因為大地震同福島核電廠洩漏事件，日股大跌兩成，至於今次肺炎疫情，之前中港股都曾經跌逾一成。急跌後，日經平均指數喺大約兩周時間竟然大反彈，收復跌幅嘅黃金比率0.764倍。
由1月21日中國確認武漢肺炎人傳人後，恒指由28795點跌至2月3日低位26145點，跌幅2,650點，以黃金比率0.764倍作參考，恒指或見28170點。以投資者對反彈市投不信任票計，反彈估計會延續，有機會28000點出到貨。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com