日經指數隨環球股市反彈，從低位升了兩成，當中的一個重要功臣，就是佔日經比重第二位的軟銀，佢計劃出售410億美元資產，用作大型回購及還債，市場似乎非常
受落，三日急升六成，不過孫正義的開心，就間接建築在馬雲的痛苦身上，因市傳將出售的資產，包括價值約150億美元的阿里巴巴（9988）股份。
軟銀本來在金融界呼風喚雨，要作新的投資，從來不愁無金主，不過去年WeWork的慘敗，令軟銀單季輸了500億港元，動搖了投資者對旗下皇牌願景基金的信心。軟銀股價今月曾急瀉近五成，投資大幅虧損固然是主因，但跌得最甘的，係沙地發動石油戰翌日，皆因願景基金的最大金主，正是沙地的主權基金，油價暴跌，沙地一時三刻都仲頂得住，但如再要課金，肯定唔會咁爽手，而事實上軟銀手上的project，未上到市又唔再泵水，在現時的經濟環境，隨時要收檔，重蹈WeWork的覆轍。
自軟銀賣資產的消息傳出後，阿里巴巴的表現明顯遜於騰訊（700）及美團（3690），更弊嘅係，這仍停留在傳聞階段，係重大不明朗因素，即使有資金想撈底，都睇定啲先啦。不過阿里巴巴被拋售，去年已經試過一次，前身為雅虎的Altaba，手持15%阿里巴巴股份，去年5月宣佈清倉行動，一度拖累當時只在美國掛牌的阿里巴巴，在兩星期內跌兩成，不過Altaba的沽售計劃相當透明，每個周五都會在網頁內申報，在場內沽咗幾多，三個幾月就沽得七七八八，少量貨尾在今年1月清埋。
而有趣的地方，阿里巴巴去年在Altaba差不多沽完時，才宣佈啟動在港的上市計劃，都啱嘅，無理由幫你出貨嘛，現時軟銀想沽貨，相信在國家利益的前提下，點都等你沽完，先會批准入港股通及入恒指啦。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.entertainment.appledaily.com