中國7省近25萬億投資計劃，數字睇起上嚟好兇狠，但當然係攤開好多年進行，單計今年，7省總和大約3.5萬億，仲未計一線
城市。不過，投資計劃亦唔係一味只講基建，仲有5G、生態環保等等。另外，官媒有樣嘢講得啱，4萬億救市嘅2008年一年經濟規模唔夠30萬億，現時講緊一年近100萬億，不能混為一談。
一個拉長多年嘅大型投資計劃，好就好在，等於長遠加強水泥行業基本因素，最有利自然係中建材（3323），原因一嚟佢最重債，債務水平啱啱去到turnaround由高峯下滑，只要水泥行業一路保持較大需求，早年淘汰落後產能亦令行業供應面變得健康，長遠絕對有條件一路減債，負債水平變得較為正常化，同時減低融資成本，盈利會繼續起飛。中建材星期一升勢最強，星期二回吐幅度較慢，絕對強得有道理。周期股裏面，中建材相信係最強代表之一。
執筆時G7財長未開會，斷估都係齊齊話減息放水，唔敢講對市場呈現幾大刺激，但可以肯定會令遊資今年內繼續搵概念亂咁炒。與此同時，美國有減息墊底，特朗普隨時再出招打壓中國，嚟同桑德斯爭選票，兩極化市況將會繼續。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com