「如果飲醉少少，就會有更加嘅親密行為，令到交叉感染風險增加。」林鄭一句說話，令酒吧內睇住直播嘅
所有人，當堂嚇一跳，然後……都係飲返啖啤定定驚先。
就喺酒吧吧枱，中環放咗工嘅李白，舉頭望明燈，低頭吟吟沉沉，「搞咩呢，飲大兩杯就會有親密行為，在下『舉杯邀明月，對影成三人』，咁是否指在下同月亮，加埋自己個影，有機會攬攬錫錫呢？呢個阿婆，係咪儍㗎？」李白氣憤難下，自隊多兩啖Corona beer。
「由6月到今日，就快成年，你仲問呢個問題？儍既似乎係你。」旁邊唔知幾時嚟咗個女仔，聲線動人，雖然戴住口罩，但以李白多年行走中環經驗，相信佢係一個靚女。「就好似啲阿媽，永遠覺得個仔上網就一定係打機、中學拍拖一定荒廢學業，後生黃絲一定係廢青，落酒吧飲酒？咁就一定係搞搞陣囉。」
「此妖婦又唔夠膽令酒吧停業，只叫酒吧禁賣酒，言下之意，我都冇逼你閂門，你可以打開門口做生意，做到你咪做囉。之前著她封關，就說歧視中國人雲雲；今日你封殺酒吧，豈不是歧視酒精？何等愚蠢呀！」
「咁你就千萬不要低估人類嘅愚昧，就好似你手上嘅Corona咁……上月尾，美國有間公關公司做咗個調查，訪問咗班飲啤酒嘅美國人，有38%話無論如何都唔會飲Corona；之後有16%人仲話，唔肯定飲Corona同corona virus有冇關係。結果個報告落結論話，corona virus對Corona嘅銷情係disaster！結果個個信到十足十。所以，真係唔好低估人類嘅愚昧，林鄭應該真係覺得飲酒，就等如親密行為。」
酒過三巡，李生覺得呢個女仔，非常之有智慧，正想借請佢飲酒為名，一睹佢嘅芳容，點知個女仔轉身就走，此時嘅李白，惟有飲多啖啤：「抽刀斷水水更流，舉杯銷愁愁更愁。 可惜，林鄭嘅偉論唔係真理。」
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.entertainment.appledaily.com