【利字當頭】港交所的奇怪邏輯 - 利世民
港交所規定大股東持超過3成又不多於5成股權，每12個月最多只可以增持2%，否則就當作強制性全面收購建議，呢個邏輯好奇怪。 資料圖片
之前都有寫過，股市，就好似同個世界局勢完全背馳，似乎完全唔受影響。早排同朋友響Webinar講到呢個問題，就連佢
都話：「一國一制又點？深圳夠係一國一制，一樣有人仆倒入市。」
所以，資產投機市場就係一個咁奇怪嘅現象：「短期波動，睇唔到長期嘅變化。長期，大家都化曬，in the long run we are all dead。」
近日有大財團大股東回購股份，係咪要表態？其實，大股東回購自己公司嘅股份，有好多原因。近年真係資金氾濫到冇嘢好買；最穩陣嘅選擇，反而係自己最了解，又控制得到嘅上市公司。
話說回頭，大股東回購同公司回購，雖然兩者有基本嘅分別，但同樣係有現金要搵出路，但最終發現係冇嘢好買，反正要搵個地方，益自己好過益人哋。當然，如果係公司回購，就係用股民嘅權益托股價，最終對一眾散戶來講，可以話係冇真正嘅得益。
但大股東回購，對小股東來講，大多數情況都係利多於弊。香港唔少家族近年都會恒常咁回購自己公司嘅股份。但大家可能有所不知，其實香港上市公司，假如大股東持有超過3成又不多於5成股權，每12個月最多只可以增持2%，否則就當作強制性全面收購建議，要買入餘下流通股份。講真，我就唔係好見到呢個規限點樣保障小投資者。投機股票嘅嘢，最終都係講個信字。你唔信一間公司嘅大股東同管理層，你都唔好買；買得，你又唔畀佢增持，呢個邏輯係咪好奇怪？5成嘅門檻，都可以明白，但3成呢個門檻，其實都係一個信手拈來嘅定位，無乜理性可言。
管治上市公司嘅原則，本來係所有股東都一視同仁；你港交所都可以容許同股不同權啦，點解響大股東增持呢件事上面，又有個咁奇怪嘅準則？
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://s.nextmedia.com