【金手指】各位，後會有期！（孫柏文）
孫柏文：香港以前，撰稿員同讀者，就可似兩仔爺咁，有嗰句講嗰句。今日則要同各位講，多謝咁多年嘅支持，後會有期！
各位，後會有期！
2008年9月30日，雷曼倒閉冇幾日，尹思哲寫咗篇題為「拘捕孫柏文」嘅文。
當時，有人喺網上正確講出東亞銀行（23）有好多
次按有關嘅資產，所以就話有錢喺嗰度嘅人應該攞返為安。而嗰位網友，亦極速被差佬拉，告「不誠實使用電腦」。
尹思哲就喺佢篇文問，如果呢條友都拉得，咁喺06、07、08年係咁話啲銀行將會因美國按揭爆破，所以非常危險嘅我，又點解唔拉呢？去凸顯「不誠實使用電腦」罪嘅荒謬。我揸住份報紙搵佢，第一句問佢：「玩到咁大呀？」
佢笑住咁答：「條題都好搶嚇啊？」跟住我哋就一齊笑。而家？我諗返起，已經再笑唔出了。
6月30日嗰晚，宣佈埋啲條文後。我睇完都有諗過，小心啲寫咪得囉。避某啲議題，就冇事。
不過大家做我fan屎咁多年，應該都知我嘅性格係點。點會忍到呀？唔好話踢爆GDP數據造假，呢啲洩漏國家機密嘅嘢，淨係唱淡例如溫哥華樓市，都唔知會激嬲邊個。上面案例之多，根本佢話係就係。而我真係唔知他朝又會預見到啲咩大鑊嘢，分享之後惹來大禍。
最可惜係，當資金分配系統，啲人覺得冇人能獨立咁check，賣方有資訊不對稱嘅優勢時，啲買得嘅嘢，股票好或債券都好，就會好似啲二手車咁，一落地就要打大折扣先會有人覺得抵買。
一個下下賣嘢，都要賤賣先有人吼嘅「集資中心」，咁就搞爛咗。希望大家唔使親身揩嘢、輸鑊甘，喺新氣候下，有人明知你會踩地雷，都唔敢再出聲警告你。
我由十幾年前第一次寫《金手指》，每篇文嘅假想讀者都係我老竇。就係因為咁，永遠唔想執筆時覺得有嘢唔講得。以前香港，撰稿員同讀者，就可似兩仔爺咁，有嗰句講嗰句。今日則要同各位講，多謝咁多年嘅支持，後會有期！
孫柏文
-----------------------------
移民英國全攻略
一連四場Webinar 專家團隊直播解答
全球樓行 x 籽想旅行
詳情登入：【港人大遷徙．英國篇】
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
屬於香港人的移民攻略
立即登入【全球樓行】
Dream House零距離
金手指 - 孫柏文 舊文
來源 source: http://hk.appledaily.com