【收市閒情】獅王要阿媽定奶奶 - 千頌C
滙控今日彷彿就好似一個新抱，嫁咗出去，但慘在阿媽同奶奶係世仇。資料圖片
中美冷戰轉眼化成「天下圍中」，隨之而來係企業成為磨心，而滙控（005）今日角色，彷彿就好似一個新抱，嫁咗出去，但慘在阿媽同奶奶係世仇。
6月中時，港版國安法擬立法，阿奶奶，
即係大陸官媒加梁振英就一齊批評滙豐，過幾日家嫂咪做嘢囉，王冬勝走咗落去簽個名表個態。點知一簽，咁又得罪國際社會。
一波未平，一波又起，大陸又話滙豐同美國篤灰，情況似阿奶奶鬧：「你個毒女人，你入得我門，你走去篤家姐灰話佢犯法！邊得你咁陰毒？」滙豐唔係冇解釋過，佢去微信度寫長文大呻冤枉，結果點，篇文都畀微信delete埋，仲加多句「因文章違反法規目前無法閱覽」。
滙豐本身19世紀喺英國殖民政府成立，目前總行在倫敦，受英倫銀行監管；不過，最賺得錢嘅地方係香港，回歸後，變相又要聽中國話；話就話歐美賺唔到大錢，但唔好忘記，佢大部份資產都喺歐美，過去仲衰過唔少次，俾美國捉到痛腳，支付巨額罰款。以前大家齊齊搵錢，冇事冇幹，當然可食盡幾家茶禮；不過，現時西方同中國炒大鑊，任你點長袖善舞，都無可能做到滿足歐美要求，而又同時可照顧中國利益。
滙豐喺國際舞台上，顯得手足無措，或者已為唔少企業帶來警號：中西方體制上的矛盾大對決，已經於商業上大爆發；國際企業不能左右逢源，「你一係揀我，一係揀佢」；結果係，全球資金靠邊站，有好似Zoom咁唔做中國生意；有好似Tiktok咁，斬美國業務賣出去；有好似一堆中概股咁，走難返香港。不過又咁，做生意，你想同一個講法治、講國際慣例嘅國家打交道？定係一個「主席說了算」嘅國家做生意？
咁滙豐幾時可以完滿解決？一係就「二揀一」，一係就等奶奶同阿媽Friend返；又或者，都係嗰句，為咗咁多股東著想，快啲幫隻獅子解除封印，回復佢本來真面目！
千頌C
http://fb.com/winbigwok
收市閒情 - 千頌C 舊文
來源 source: http://s.nextmedia.com