金融High Tea——俄羅斯打響炒疫苗第一槍
港股經過兩日喪炒傳媒股，昨日開始回復正常，大致跟住外圍走。美股連升7日後回調，港股開市亦偏軟，去到午後才在傳統股帶動回升，表現與美股開始炒疫苗面世相似。恒指收報25244點，急升353點，兩日累彈866點；市場交投活躍，大
市成交增至1440億元。滙控（005）、恒生（011）、渣打（2888）分別抽升近5%，單是滙控獨力已踢高恒指101點。
不排除好快輪到A股
新冠肺炎爆發，掀起各國研發疫苗競賽，中、英、美三國疫苗上月下旬最早進入第三期臨牀測試，但俄國疫苗未做第三期臨牀，已搶先宣告自己達標，註冊疫苗專利，俄羅斯總統普京仲話自己個女打咗疫苗，預計疫苗9月可以量產，10月開始大規模接種。俄國的搶閘行為，同時打響炒疫苗面世重啟經濟的第一槍。早前有報道質疑，俄羅斯利用黑客盜取美國疫苗技術，現在俄國曬冷攞頭彩，相信又會引起相關炒作。
據疫苗專家同陸羽仁解釋，要做疫苗其實唔難，差別只係效力同副作用如何，即係接種後有幾成機會免疫，以及接種後出現嚴重副作用的比例有幾高。本來正常開發一隻疫苗，大約要兩、三年時間，副作用可能要降到一百萬個接種者，先有一個案例才合格。醫學界先前估計若美國監管部門開快車，因為第三輪臨牀數以萬計人去測試副作用，原本要2022年才做完，最快要明年底會有新疫苗推出，但今年係美國選舉年，專家估計特朗普必定會催谷喺11月3日投票前，未做完臨牀都搞出首隻疫苗。喺咁嘅情況下，中國好可能喺接近時間都會推出，不排除好快A股都會炒這個概念。
疫苗面世時間同成效標準有關，標準愈低推得愈快，專家話，新冠肺炎傳播性強，美國又不想犧牲經濟，現時每日有幾萬人感染，既然係咁，就算未達到一百萬比一的副作用標準，因為美國確診死亡率有3.2%，每日死1000人，使用疫苗計埋副作用都除笨有精。相反，如果好似香港情況，傳播相對受控，自然不會博。他估計首批疫苗推出，會先讓高危群組好似醫護先打，然後再向大眾推廣。
依照專家分析，現時美國對疫情處理都係咁搞，所以最近美股杜指唔經唔覺又升近28000點，逐步接近疫前水平，反映市場對疫苗開發進展逐步消化。
港股昨日特點除了喺午後升幅擴大，就係部份本地股回彈，當中商場股九置（1997）急升5.4%，收報32.45元，九置股價喺全日禁堂食前插至27元水平，創出疫後低位，但今個星期隨染疫個案回落，連續上升幾日。香港抗疫手段比較鬆弛，北京6月的小型爆發，26日內確診人數歸零，香港雖然未至話係佛系抗疫，但漏招「蝦碌」情況不時發生，相信要有兩三個月才能歸零，之後高官恐怕亦不敢隨便大手寬限，甚至放完又收，所以商場股真正要捱到比較平穩的日子，可能都係要等到有疫苗。只不過，商場股資產優質，加上股價大落後，故此偷步先炒一段。
過去三日本地傳媒股借住有人呼籲買壹傳媒（282）課金炒作一番，不過隨著公司主席黎智英獲釋，同證監會表明會調查，炒風午後急降溫，壹傳媒昨日由最高的1.75元急插，股價大跌41%，收報0.65元，從高位計勁插63%。其他跟炒股份都係大漲大回，如毛記葵湧（1716）亦跌36%，收報0.99元。
萬華沽毛記多謝課金
在混亂之際，明報系的萬華媒體（426）就公佈，早一日按每股平均價1.547元，出售持有的675萬股毛記葵湧，佔該公司股本2.5%，合共套現1040萬元。之後昨日收市後透露又再沽，看來策略都係有得賣就賣。萬華媒體係毛記上市前的原始股東，上市時受限制未能高位沽貨，但當時萬華大股東華文媒體（685）被人炒起，大股東趁機都沽咗部份華文媒體股票，套現一筆現金。這番毛記有小陽春，萬華照辦煮碗，先收一筆課金，真係要講聲多謝啦。
陸羽仁
金融High Tea - 陸羽仁 舊文
來源 source: http://hd.stheadline.com