點解有啲地方升得多但無人講？
過往十年，英國升幅最多的地方知唔知喺邊？好多人以為是倫敦，冇錯，倫敦有七區佔據十大升幅榜，包括Walthamstow(第二位，升幅117%)、Peckham(第三位，升幅107%)、Tottenham(第五位，升幅106%)等，都升超過一倍。不過升得最
多的，是位於Bristol的Easton，十年升值120％，十年先升一倍多啲？係咁㗎啦，你估香港下下升幾倍咩？！習總話齋，樓係要嚟住嘅。Bristol是英國其中一個科技城市，故發展比一般城市快，亦由於不斷有新的科技公司進駐，需求大量專材，從事科技行業的朋友都知道人材難求，薪酬絕對不能手緊，賺到錢當然想住好啲，買又好租又好，住屋有需求自然幾靚都有，樓市水漲船高效應就此形成。其實環顧全球樓市，美國矽谷、中國深圳都因此而成為該國升值最快的城市，疫情留家概念令人更依賴科技，這是全球不可逆轉的趨勢，現時投資這類城市值博率較高。
為何呢啲升得好的地方，香港咁少人談論，展銷會又無，KOL又唔講呢？醒目的讀者沒理由不知原因，我已經寫多咗。最近有個北海道樓盤聽聞賣得不錯，三、四百萬有獨立屋，地點還要是香港滑雪友至愛，老實講見到廣告我都想整返間，實際一點想，有樓會減少了去享受不同靚酒店的樂趣。若論投資角度，因滑雪度假效應，該地地價已升近十年，買家主要是中國香港澳洲人，主要集中在雪場一帶，仲有幾多升幅自己諗。俱知安町其實好大，離雪場十分鐘車程空地多到不得了，供應還陸續有來，加上每年除雪除蟲保養費用不少，都係算罷啦，疫情下要玩買架跑車實際過。當地最值得是買地起樓，只是手續麻煩而且涉及專業知識，不是一般投資者可以做到。疫苗一日未出，睇怕今年滑雪都無望，近兩年當地銷情應該幾慘淡下，反而是買地好時機。
HEA富專欄 - 郭釗 舊文
來源 source: http://www.am730.com.hk