多倫多公寓不再吃香
我有一個在加拿大回流香港多年的朋友，閒聊間透露早年在多倫多投資的公寓(condo)因疫情關係重創：「啲人走咗去買townhome，個個work from home，貪地方大啲吖嘛，住condo又怕感染，所以咪跌價囉，好彩我自己買得早，有一間本來50萬加幣買返嚟，
升到去90萬，依家跌返去70萬。」計埋蝕匯水，其實冇乜幾多落袋。
香港地方細樓價高冇乜得揀，除非聽政府呼籲投入大灣區懷抱，多倫多就不同，不住市區，可以住郊區，居住環境好一點，成本又低一點。以前不太受歡迎的地區，現在突然變得炙手可熱，如距離多倫多市中心兩個多小時的Durham，因為該區連花園獨立屋的價格相對可以承受和低水，York和Mississauga已經很貴，所以人們湧去Durham買屋仔，需求激增，令屋仔價格在2019年11月至2020年11月之間急升23.9％，現約616萬港元一間，相比大多倫多的平均水平850萬，仍有段距離。至於市中心，獨立屋價格升8.7％，聯排別墅升7.3％，公寓就跌3％。
多倫多市中心的公寓曾經風光一時，2017年6月曾創出同比上升32.6%的紀錄，但自此開始下滑，2018年中開始徘徊個位數升幅，疫情下見紅亦可以預期，如上文所說大量人口外流，加上移民暫停和大專生留在老家，導致目前的市中心幾乎成鬼城，公寓租金已大跌兩成。另外原本作為Airbnb出租的公寓，業主因沒有旅客而血本無歸，疫情又唔知幾時完，為減低經濟負擔，遂恐慌性拋售，今年4月至10月在售公寓由1,659個增至6,153個，10月成功出售只有2,260間，超過六成賣唔出，供需失衡，唔跌就奇！
HEA富專欄 - 郭釗 舊文
來源 source: http://www.am730.com.hk