智取大市｜1月20日股市轉捩點？（晉佳）
拜登上場將令不明朗因素掃除，最驚青資金都進場時，股市升勢可能告終。
特朗普離任前搞到咁大，變相為「狂人政治」趕客，直頭好似鋪紅地氈歡迎拜登咁款，亦令特朗普2024年難以捲土重來，試問日後佢如何再組班？「狂人政治」壽終正寢，中港股自然較過往4年受歡
迎，亦為近日港股跑贏美股嘅原因之一。短線咁睇，投資者最怕變數，喺拜登上場前要避險，資金流保持有利港股，但去到大約拜登正式上任嘅日子，連最驚青嘅投資者都入市，後市反而對港股以至美股不利。呢一刻，就將1月20日定為一個分水嶺先，喺呢個日子打後開始要變得審慎。事實上，睇港股以至Bitcoin癲況，實在唔覺得可以玩到幾多日。
港股強過美股亦實在太明顯，今日港股出現調整，恒指仍然維持喺5天線樓上，勁過以20天線為支持嘅納指同標普500指數，但美股仍然走勢不錯。今次升浪嘅龍尾股，可能係一批走勢見轉弱嘅科技股龍頭，最強勢已經係蘋果，連日調整過後，估計短線快將能夠觸底回升，當白宮順利過渡，刺激一眾科技龍頭如Amazon向上，甚至連中美一齊打壓嘅阿里都絕地反彈嘅話，呢浪升勢隨時炒到差唔多了。半新股唞氣，電動車股未升完，光伏股更加升到停唔到，係時候留意落後光伏股，協鑫升超過一成後，可留意陽光能源。
-----------------------------
掌握理財智慧 感受生活品味
investMAN全新網頁 優雅登場
-----------------------------
部署退休 輕鬆達至財務自由
點擊即睇《退休理財天書》
-----------------------------
【全球樓行】 Dream House零距離
屬於香港人的移民攻略
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
智取大市 - 晉佳 舊文
來源 source: http://hk.news.appledaily.com