操盤手劄記│拉尼娜現象受惠股（割柑人）
操盤手劄記│拉尼娜現象受惠股（割柑人）
拉尼娜一詞，源自西班牙文「La Nina」，意即女嬰，係指太平洋中東部海水異常變冷現象。
港股喺11月份向來牛皮，過去30年有27年變幅不足一成，當中更有18年變幅不足半成，今日開局會點？上周五美股三大
指數破頂，但港股夜期同ADR比例指數分別低水0.8%同0.6%；三大藍籌科網股ATM在美股價更較在港股價低1.6%至2.1%。中國再颳監管風暴，繼人行批評跨境互聯網券商「無牌駕駛」後，市監局又就互聯網平台「分類分級」同「落實責任」作諮詢；另外，美國CFIUS調查騰訊（700）收購遊戲商Sumo交易，都令中槪科網股添上陰霾。
下載Yahoo財經APP
美股、外匯、加密貨幣免費即時報價，自選投資組合獲取相關新聞提示。
今日係11月開局，亦係大復牌日！瀕臨清盤而獲「白武士」打救嘅民眾金融（279）、多次延遲公佈業績嘅保利協鑫（3800）、疑涉網絡攻擊而遭美國FBI突擊搜查嘅百富環球（327）、持有百富環球33%嘅高陽科技（818）、大股東洽賣盤或觸發全購嘅雷蛇（1337），都喺今日復牌。除非閣下係清兵，否則食花生算喇！至於本周重頭戲，就係美國聯儲局議息，市場關注收水同加息嘅路線圖，本港時間周四淩晨2時開估。
氣候峰會前夕 中國減排照舊
剛於周日開幕、下周五閉幕嘅聯合國氣候峰會，將會就《巴黎協定》生效5年評估進展；不過，峰會舉行前夕，中國向聯合國提交嘅文件顯示，原訂減排目標無變，即2030年前實現碳達峰、2060年前實現碳中和，意味今屆峰會全球加快減排嘅可能性降低。點解中國並無調高目標？此前發佈嘅碳達峰行動方案，就講明要以保障國家能源安全為底線！無論如何，今屆峰會應會著眼新能源產業。
氣候危機確實需要重視，大氣中嘅二氧化碳濃度提高，會令地球表面溫度提高，而全球暖化，會令冰川融化，引致海洋水位上升，同引致極端天氣頻生，如熱浪、山火、旱災、水災、暴風、暴雪等，造成生命財產損失，所以減少碳排放，係全球使命。中國今個冬天特別冷，北京10月中錄得52年嚟同期最低溫度，氣象局歸因10月出現拉尼娜現象。有科學家認為，全球暖化造成北極冰川融化，冰冷淡水流近大海進而造成拉尼娜現象。
羽絨股波司登 兼具冬奧槪念
拉尼娜一詞，源自西班牙文「La Nina」，意即女嬰，係指太平洋中東部海水異常變冷現象。相對拉尼娜，係厄爾尼諾，源自西班牙文「El Nino」，意即男嬰，係指太平洋中東部海水異常變暖現象。兩種現象通常交替出現，為太平洋西部嘅東南亞帶嚟暴雨同嚴寒，又為太平洋東部嘅南美帶嚟乾旱。美國、中國氣象局先後預警，北半球未來幾個月會受拉尼娜影響。對市場嚟講，拉尼娜引發嚴寒，民眾需要取暖，能源需求增加，禦寒衣物需求亦增加。
波司登（3998）係中國最大羽絨服裝企業，正係拉尼娜現象受惠股之一。集團喺全國超過65個城市設有零售網點，售賣六大核心品牌羽絨服裝，包括「波司登」、「雪中飛」、「康博」、「冰潔」、「雙羽」、「上羽」。北京冬奧將於明年2月舉行，亦可望帶動冬季運動同戶外服裝需求。據彭博綜合券商預測，波司登2022年、2023年（3月年結）盈利，預期分別按年增長22%、25%，不妨留意。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com