操盤手劄記│誰在拖阿里後腿（割柑人）
操盤手劄記│誰在拖阿里後腿（割柑人）
阿里面對嘅問題，又比騰訊多。
虎年未到，已感覺到通脹猛於虎！美國祭出加息縮表兩大「門神」，聯儲局本周議息前，歐美股市上周五跳水，泛歐Stoxx 600指數插水1.8%，美股道指、標指、納指分別插水1.3%、1
.9%、2.7%。追蹤美國上市中概股嘅納斯達克金龍中國指數插水4.6%，港股ADR比例指數低水1.5%。科網股最傷，港股藍籌科網股中最重磅嘅ATM，美國股價分別較香港低5.6%、2.2%、3.7%。
美股、外匯、加密貨幣免費即時報價，自選投資組合獲取相關新聞提示。
講到藍籌科網股插水，唔係愈重磅愈巴閉，輕磅嘅京東（9618）、網易（9999），美國股價分別較香港低6.6%、6.9%，插水更深。隨著息口回升，資金成本增加，市場風險胃納收縮，不利增長型科網股，無分重磅輕磅。就如哈姆太郎（倉鼠）被格殺，比卡超（松鼠）、米奇（老鼠）都死！現時對科網股，要用「動態清零」策略，只宜短炒，盡快賺錢出貨，防控倉位風險！
基金經理調查 捨科企取銀行
科網股已由得寵變失寵，美銀1月全球基金經理調查顯示，業界憧憬全球解封蓋過擔心央行加息，各類調配包括由信貸產品轉向大宗商品、由增長股轉向價值股、由科網股轉向銀行股。大手減倉嘅順次係科網股、通訊股、債券；大手加倉嘅順次係銀行股、工業股、商品。整體嚟講，業界並無睇淡股票反而超配，只係集中減持債券，似乎押注經濟、通脹同時走強。
中槪科網股面對嘅問題，比美國同業多。芸芸中槪科網股中，以規模同賺錢能力計，騰訊（700）同阿里巴巴（9988）可算拍住美國同業，而且上年股價分別大跌近兩成同近五成後，現價市盈率分別為23倍同15倍，估值都平。點解上周五美國股價仍插水？一來關收水事；二來關監管事，包括中國人社部再對互聯網平台行政指導、中消協發布互聯網平台春節消費警示。
阿里美資股東 逢反彈即減倉
阿里面對嘅問題，又比騰訊多。其一係美國國安審查阿里雲；其二係阿里美資股東逢高散貨。阿里2019年11來港掛牌，其ADS本港託管行花旗被轉入41.1億股或近兩成股本；2020年11月首見大戶搬貨來港，涉12.6億股或近6%；2021年又見5度搬貨，涉51.3億股或近兩成半。存貨在港已過一半，伺機散貨格局。確實，每次搬貨後都見轉出減持。而按中央結算持股紀錄，花旗持倉喺今年15個交易日大減近1.5億股，值近190億元。
阿里ADS上周五在美收報123.23美元，以1份ADS換8股計，折算約120港元，較在港收報127.1元低5.6%。當日阿里在港已跌3.3%，10天線得而復失，短線技術走勢再度轉弱。觀乎今年以嚟嘅反彈市，阿里ADS託管行花旗持倉每日減少，反映美資股東逢反彈即減倉，喺阿里爬升時拖後腿，成為後市阻力。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com