操盤手劄記│戰火中的一點綠（割柑人）
操盤手劄記│戰火中的一點綠（割柑人）
上周四，俄羅斯正式向烏克蘭開戰，現時烏克蘭全境戰火彌漫。
美國大文豪馬克吐溫名句：「歷史不會重複，但會押韻。」中國19年一個新舊曆重疊周期（公曆、農曆回到同一「起跑線」），2003年2月1日係農曆正月初一，
今年又係。2003年香港內憂沙士疫情，外憂伊拉克戰爭；今年香港內憂新冠疫情，外憂烏克蘭戰爭。當年香港捱過上半年困境，下半年脫困，今年又會點呢？希望疫、戰都盡快平息吧！
美股、外匯、加密貨幣免費即時報價，自選投資組合獲取相關新聞提示。
上周四，俄羅斯正式向烏克蘭開戰，現時烏克蘭全境戰火彌漫。多國宣布制裁俄羅斯，包括歐盟、美、加、英、法、德、澳、紐、日、韓等，主要係經濟制裁如凍結資產、限制融資、限制出口等。至於被視為「核彈級金融武器」嘅國際支付系統SWIFT，美、加、英、歐盟等西方國家剛於周末晚間發表聯合聲明，將多間已受制裁嘅俄羅斯銀行踢出SWIFT；德更聲言，如有必要，可擴至其他銀行。
將俄踢出SWIFT 殺傷力最大
各國制裁措施有冇料到？將俄羅斯踢出SWIFT嘅殺傷力最大！同SWIFT脫鈎，俄羅斯嘅國際金融交易，包括佔該國總收入超過四成嘅石油同天然氣出口收益將會被切斷，其經濟必然受創。除咗呢個金融武器，各國會否出兵烏克蘭？美、英已表明唔會，美國總統拜登更加係兩個月內四度表明唔會！不過，雖然烏克蘭唔係北約成員，美、英無義務協防，但根據《布達佩斯備忘錄》，又唔係無責任。
《布達佩斯備忘錄》係美國、英國、俄羅斯喺1994年同烏克蘭簽署嘅安全保障協議，以換取其放棄前蘇聯遺留嘅核武，意味俄軍侵烏，美、英唔會袖手旁觀。不過，睇返有關保障嘅第四條，寫得好弱，保障只係「to seek immediate United Nations Security Council action to assist」。上周五，聯合國安理會表決美國提出譴責俄軍侵烏嘅草案，被俄投票否決未能通過，咁係咪叫做seek完？！
港府因應疫情 延期發行綠債
講返股市，上周四俄烏開戰，全球股市應聲大跌；不過，投資者趁低吸納，美股先跳水後跳彈床，倒升收市。呢啲市況，香港股民實會諗起鄭少秋！丁蟹效應、大奇跡日！原來上周四秋官75歲生日，又會咁啱！美股上周五延續升勢，道指、標指、納指分別再升2.5%、2.2%、1.6%，港股ADR比例指數亦高水1.4%。俄羅斯RTS指數喺大跌38.3%後，上周五更報復式反彈26.1%。
俄烏戰火仍熊，雙方會否和談，各國制裁會否加辣，美國聯儲局會否因而忍手加息⋯⋯市場充斥不明朗因素，投資宜審慎。本來穩穩陣陣可以認購港府首次發行嘅綠色零售債券，但港府剛於周末宣布因應疫情延期發行，該批綠債原定3月1日起接受認購，現時未知何時重啟。綠債條款同iBond相若，年期為3年，每手1萬元，每半年派息1次，派息同通脹掛鈎，包底利息有兩厘，值得認購。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com