笑到最後 - 高明 2022年3月23日

笑到最後 - 高明 2022年3月23日


笑到最後｜港版SPAC點先為之成功（高明）
笑到最後｜港版SPAC點先為之成功（高明）


SPAC即係殼股，香港終於可以名正言順啤殼。
上星期五，香港第一間上市特殊目的收購公司（SPAC）上市，上次港版納指都叫改個名做恒生科技指數，今次連名都照用一模一樣，見證住唔識做，不如直接抄，其實都幾務實。

美股、外匯、加密貨幣免費即時報價，自選投資組合獲取相關新聞提示。

SPAC即係殼股，香港終於可以名正言順啤殼，簡單講就係將上市門檻降低，SPAC好唔好，取決於未來有冇一隻成功經SPAC合併後，股價正常靚仔，生意又可以持續發展嘅企業。依家興講「初心」，上市嘅「初心」，就係集一筆唔使還嘅錢，幫間起步中嘅公司發大，SPAC嗰類更加甚，就係幫啲可能有前景但未有盈利嘅公司，搵股東一齊燒錢，燒到有一日購，類似亞馬遜（AMZN）嘅成功故事。

當然，亞馬遜係IPO唔係SPAC，將香港SPAC成功條件定係出一間亞馬遜更加係對港股市場唔公平，除咗近日低位反彈，港股已經橫行超過十年，換轉係日本已經會被人話迷失十年，只係香港唔會咁形容。可見塘水滾塘魚嘅市場，唔應該有太高嘅要求。

美股合併後比較好炒嘅SPAC，其中一隻叫DraftKings（DKNG），與其話係一隻博彩股，實際炒就係國策，因為美國有真正嘅司法獨立，唔同州嘅法院裁決「夢幻體育」（fantasy sport）唔算賭博，或者容許呢種賭博喺嗰個州嘅網上舉行，令到市場擴大，合併後不斷有新嘅裁決，股價接連上升，直到成個SPAC炒完先冧。

締年輕創業上市故事
套用返香港嘅特殊情況，如果有一隻SPAC，可以令一間香港土炮創業公司上市，上市後炒到半年貨仔，就算之後股價散曬，已經可以當港版SPAC係成功，因為創辦人Exit到、投行搵到錢、條街炒過、監管機構又交代到，最重要係，政府可以搵到一個年輕創業上市香港故事，公司創辦人Exit後成為香港嘅吉祥物，加入金發局或青年發展委員會成為上市KOL。

惟一可惜就係美國投資者已經玩爛SPAC，SPAC股價不振，喺英文財經傳媒出現次數大減，撇除最近反彈浪，美股今年興懷舊，擁有持續升幅嘅股，係上一代霸權股、油股、藥股、農業股等等。

所以雖然唔識就照抄好應份同合理，但美股又好狡猾，每次到你想抄佢時，例如想跟佢嘅牛三，美股即刻股災你睇，結果抄嘅人未享受到成果，就即時當頭棒喝。

高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出
笑到最後 - 高明 舊文

本文作轉載及備份之用 來源 source: http://hk.finance.yahoo.com