笑到最後｜日本車會否因電動車而沒落（高明）
笑到最後｜日本車會否因電動車而沒落（高明）
日本車本身都係歐洲車嘅後起，因為性能穩定而跑出。
就算係好似高明咁，2019至2020年跨年去日本過新年，屈指一算主流香港人已經兩年冇去過日本，一個被香港一部份旅客稱為鄉下嘅地方。日本令到呢部份港人
嘅欣賞，可以用一套電影「最後武士」簡單推斷，日本一方面經歷明治維新大規模西化、現代化、科技化，另一方面對傳統嘅「菊與刀」有堅持，所以去到日本成日見到類似迴轉壽司呢種科技及傳統嘅混合體。
美股、外匯、加密貨幣免費即時報價，自選投資組合獲取相關新聞提示。
曾經嘅科技及工業大國，時移世易，俾美、韓、中嘅企業，上中下三路夾擊，撇除咩產業鏈向上遊如晶片原材料技術之外，一般消費者睇得到嘅日本強大工業，可能只剩下汽車有較強嘅競爭優勢，美國十大汽車之中，日本牌子佔6架，香港見豐田（TM）好似見普通的士咁，以前有一幅美帝汽車嘅Flirtatious Level嘅相，豐田竟然同平治同級，可能誇張咗少少，但喺美國揸日本車肯定就唔係窮人階級。
但係世界又出現洗牌，電動車開始取代油車，雖然好多國家所制定嘅2030年全電動車，高明認為現時只係吹大咗，到時會延期，但係電車食咗油車嘅市場就係肯定。
重申一次：推動新能源嘅動力，係油價貴；電動車嘅最大廣告牌，掛喺油站度。雖然油貴同係能源嘅電力都會加價，但計返會公里肯定係電較平，解決嘅問題只係續航力、電站及充電時間，現時已經逐漸解決，美國地方大穿州過省電車始終有局限，而香港地方貴充電站唔足以全民電車亦係另一問題，但科技發展總會解決，又或最終社會係油電混合一半電一半油車。
倘再次全球化 肯定冇運行
呢個問題就會令日本車處於落後嘅地步，唔好話Tesla（TSLA），相對GM（GM）及福特（F），日本車廠對電動車嘅發展較為落後，最近本田（HMC）宣佈會投資640億美元用作研發並計劃2030年推出30部電動車，股價亦都反映咗日本汽車唔係太受惠呢個轉型期。
喺消費層面上，電視家電之類已經被三星邊緣化，曾經Sony（SONY）霸權，現時PS5仲有炒價算維持到，但打機市場又面對手遊蠶食（雖然市場對Sony電動車會唔會裝PS5手掣有啲期待），仍然有霸權級數嘅汽車，一樣面對日本產品多年來受到嘅市場轉型同上下夾攻情況。
當然，日本車本身都係歐洲車嘅後起，因為性能穩定而跑出。相對好多國家，日本嘅優勢係齊架生，全世界晶片短缺，豐田都仲可以維持供應鏈，直至近期先減產。可以預期，全球鎖國嘅話，日本嘅生產能力影響最細。過去兩年嘅教訓係，無論幾高科技，有材料生產到、運到先算贏。如果正常國家解除疫情禁運，再次全球化，日本汽車以至各種產品都冇運行，因為平嘅可以買中國製造，貴嘅一樣有其他選擇。但係如果全世界都係時開時唔開，好似日本咁各項較為齊章嘅國家，就仍然會有條生路。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com