士佳說 - 張士佳 2022年5月13日
【#士佳說 】張士佳：冇細藝炒賣事件
【#士佳說 】張士佳：冇細藝炒賣事件
前兩日做到兩轉美團#3690逢低入牛博反彈，正股彈升6-8%，牛有槓桿就更加和味，有美味早餐食，尋日又低開，好在專登提大家今次未必會彈得高，要忍下手。尋日剛開市有彈到200點下午就無以為繼，收市要倒跌400點，科指仲要由頭跌到尾收市，再穿4000點。
既然嗰市吾係咁好，我就主力做美股軟件，做咗兩三年，都仲做緊，希望今年可以完成啦，做還做，都要搵D使費，#6108新銳醫藥遇上呢排個股大冧都有得即市彈下，之前有炒過一轉順風車，在本欄亦提過等破阻力先買返，呢隻股超大波幅五日升五倍，點知尋日突然穿底大跌，佢由1.07 一路跌，0.5 0/0.4/0.3，跌落去嘅刀我梗係唔會接，我等佢彈番到0.355果時，通報學生我關邇，唔夠十幾分鐘就到0.39，十個巴仙，可惜注碼唔夠大，幫補唔到我隻#688（昨日止左蝕，主要受到融創稱未能付到期票據利息，擔心會陸續違約，人民幣又走弱，影響成個內房氣氛，近日買咗內房都要輸錢錢）。6108 呢隻梗係唔會再炒，但係講比大家聽，就係近日執得最多嘅，就係呢啲突然大跌，然後拗腰，像1119，
1865，1529，本來嗰啲股冇乜機會，但真係跌個機會出來炒轉即市大賺，呢啲大家要留意，咁捉呢啲就當然要有時間睇住，一定係睇分鐘圖唔通睇日線圖咩，至於點捉到佢真彈，還是彈少少就散學生一定識我嗰幾個英文字母嘅方法，粉絲們，就要學吓留意，跌到落去嘅轉勢位，最低限度，你會見到跌到倒水咁，突然有幾分鐘跌極跌唔落，咁嗰刻就開始值得留意，唔係唔跌喎，係成交幾大都好，同之前跌嘅分鐘唔同咗，之前成交唔係好大但跌好多，到尾聲，成交好大但跌唔落，再加嗰幾隻英文字冇方法就係捉反彈嘅時候。
咁又唔係機會處處，尋日就有一個陷阱，路透傳華潤集團用每股2.5元私有化四環醫藥#460，當時股價只有1.2x，咁荀，荀到我天真的同事都去學生群組通報，我見到就即刻走出去喝停，唔敢阻人發達，所以提路透有冇咁神通廣大，真係信嘅話都係炒下就算，我心諗四環醫藥生意又不是太差，只是暫時受疫情影響，就算傾私有化，都唔會漏出嚟，更加唔會連私有化個價都漏出嚟；依家市場唔係咁好，好多人想搵食，消息以假亂真，大家仲記唔記得上次馬某事件，市唔好我相信嚟緊會好多假消息，憑消息炒嘢大家真係要諗過度過。
反觀之前提過隻華潤醫藥#3320，今次形容為收購方，反而慢慢升得吾錯，有政策支持其公司研發兒童用藥品和罕見病藥品的研製及創新，股價似乎望住前頂，如果跟進短炒，穿越250天線3.94 左右止蝕。
加密貨幣繼續爆「幣災」，Bitcoin跌穿3萬美元，連較穩定幣Stablecoin之一的UST單日急跌5成，與斬倉有關，可見資金流動性隱憂，美國通脹和衰退憂慮繼續困擾市場，美股跌跌不休，仲未止瀉，環球市場似慌忙套現。
幣市反帶動股市，尋晚夜期再次跌回19000點附近，之前寫19,000一20000， 尋晚最低到19085，諗住跌到18999買，點知去到19085就冇再落，彈返上去又唔捨得買住，錯過咗一個機會，如果今日咁都唔彈，再陰燭跌穿，會造淡科股如阿里巴巴#9988，尋日再跌穿過80，升市一般般，跌市佢又跟到足，馬某仲在慈善務農，即係有排都未輪到佢。
編按，五月課程滿晒，已經有人排八月，阿Sir話佢年紀大機器壞，唔開得咁多班，但我見佢打波都打幾個鐘，哈，大家請耐心Standby。
報名及留位連結：https://bit.ly/3OSJj7h
士佳說 - 張士佳 舊文
本文作轉載及備份之用 來源 source: http://skycheung.weebly.com