【平民投資教室】錢俊：價值投資嬴連登契媽？
平民投資教室
日期：2022-06-07
更新時間：09:24:26
連登（前？）契媽Cathie Wood嘅基金過去一年返魂乏術，好多人覺得係「退潮就知佢無褲著」，證明股神巴菲特嘅價值投資法先係皇道。
投資界有個習慣用市盈率或市帳率等將股票
分為兩個極端，即係價值股同成長股。前者為市盈率較低嘅行業，一般係銀行、電訊、必需消費品等「舊經濟」行業，業務比較成熟，盈利少有突破性增長。而後者主要為「新經濟」股，比如係科網、新能源、電動車等，雖然現時盈利仍未追得上股價升幅，但投資者預期盈利增長將可以爆發式上升。巴老同契媽就剛好各走兩個極端。
參考巴菲特嘅投資組合，佔比最高係蘋果公司，佔全個投資組合超過40%，但基本上已經係所有科技股持倉。另外約四分一係金融股，包括美國銀行同美國運通。如果以市盈率嚟睇，巴郡為7.8，標普500指數為20，納指為22，所以巴郡算得上係價值股。
價值投資經常講嘅係長線投資，就算依家股價未反映實際價值，總有一日大家會睇到而且股價會跟隨。客觀地睇返數據，由2012年到2021年呢十年，巴郡股票回報為每年14.6%，標指16.5%，納指更加係22.9%，「長線就嬴」呢一點似乎唔太站得住腳。但如果淨係睇今年至今表現，巴郡升5%，標指納指均為負數，又的確跑嬴成條街。
其實價值投資同成長投資，兩派一直各有支持者。過去十年數據話俾我哋聽，喺牛市時成長股確實表現更好，而調整期及熊市就價值股防守性較高。兩個投資風格，似乎都係投資風向影響結果，多於一個永恆嘅定律。
RPV：巴郡支持者
近期價值股偏強受惠多項因素。比如因為加息同通脹，對價值股之一嘅銀行股有利。此外，一啲受經濟波動影響較少及業務比較穩定嘅公司，比如非電訊及必需消費品，又有穩定派息，喺過去幾個月股市波動期，較多資金泊入去避風。加上好多石油股都係價值股，能源價格高企自然又跑嬴大市。
由於通脹與高油價未來一段短時間都可能持續，如果想做短期調配買價值股，可以睇下Invesco S&P 500 Pure Value ETF（US:RPV）。基金追蹤嘅指數主要喺標指入面，基於市盈率、市帳率同市銷率，揀選嘅深度價值股。巴郡為基金第三大持股，佔投資組合2.2%。其餘十大持股包括肥料生產商Mosaic、金融機構Prudential Financial及Cigna、石油公司Marathon Petroleum同Valero Energy等。上述除咗巴郡外，其他公司喺標指入面佔比都係好小，如果主力投資標指相關ETF，買RPV可平衡嚇科技股佔比較重嘅情況。
表現方面，年初至今升5.6%，跑嬴標指負12%好多。但五年總回報只有59%，同期標指ETF有近87%。若果下半年通脹放緩，加息速度放慢，科技股再次回勇時，無涉及成長股嘅RPV就好可能跑輸，所以可能適時就要減磅。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com