笑到最後｜想買股發達？賣股更發（高明）
笑到最後｜想買股發達？賣股更發（高明）
如果買賣股票可以發到最盡，持有大股份嘅創辦人應該賺得最多。
福布斯專欄作家Rainer Zitelmann近日再提出，買賣股票並唔係發達嘅工具，全球十大首富，由亞馬遜（AMZN）Jeff Bezos，到Alp
habet（GOOGL）、Meta（FB）甚至Zara創辦人，絕大部份都係做生意，唯一被稱為股神嘅係畢菲特，但畢菲特又係由股票佬轉型做企業家先咁有錢，只可以算半個。純炒而最有錢，可能索羅斯先係炒家界嘅天花板，佢背後有冇咩任務則另一話題。Zitelmann嘅結論股票係維持富有嘅好工具，而唔係白手興家途徑。
美國商學院教授Thomas Stanley喺1990年代晚期調查美國733位千萬富翁，發現其中得12%主要靠股票發達；2012年，德國一項科學研究調查472位千萬富翁，結果發現其中僅2.4%是靠投資股票致富。十分之一受訪千萬富翁表示，佢哋靠投資房地產發達，德國嘅情況可能同香港較接近。
上述研究時空唔同，但結論相若，股票致富嘅程度係有限，去到會登嶺絕頂嘅全球首富，只係投資股票基本上冇可能做到。貼地少少計千萬富翁，就開始出現股票投資者身影。
公司創辦人賺得最多
講到尾，如果買賣股票可以發到最盡，持有大股份嘅創辦人應該賺得最多，財富榜已經反映咗呢個事實，科企首富唔係唔炒股票，而係主要財富來源係股票，變現方式係賣股票。一般人透過買佢最初車房揼出嚟嘅生意，創辦人零成本，你幾百至過千美元一股咁買，永遠冇可能賺得多過佢。情況有如香港，買樓嘅人有錢，但最有錢係賣樓嘅人。
炒股會發大達嚟自高盛大摩之類話畀佢員工聽好精英嘅人先喺華爾街返工。遠古時代可能係，但近代最精英嘅人已經係從事Start up嘅人；次一級嘅就係Startup嘅創辦成員。幫高盛大摩打工係好勁，但係加入已發展企業，風險系數好低，成功嘅幅度又會細咗。再數落個人炒股投資，其實又係依附成功創業家坐順風車嘅人。
所以炒股即使未必係發達嘅來源，一般人例如你我，普通資質，普通能力，照一照塊鏡，望唔到一個Elon Musk，但對發達又有一團火，幫你取得財富嘅工具不外乎：打工、創業、通婚、投資，對於大部份人嚟講，希望透過買賣股票提升財富，係局限下嘅選擇。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com