平民投資教室 - 錢俊 2022年11月15日
【平民投資教室】錢俊：三大利好消息亦係不明朗因素
平民投資教室
日期：2022-11-15
更新時間：09:25:54
過去幾個交易日，三大消息刺激令港股曾重返萬八點—美國通脹數字低於預期令市場相信美國加息速度放緩可期；內地放寬入境隔離要求；到昨日人行及中銀保監會出台支持內房措施。
三項消息當然都係正面利好，但實際最終結果是否如預期一樣則仍有待觀察。過去幾個月美國通脹數字出爐如同賭檯開大開細，結果無人知道。隨時下個月數字又高過預期令股市又跌返唔出奇。
內地隔離政策方面，5+3只係之前7+3嘅微調。令人擔心係會否因為調整後加上冬季，走漏感染者機會更大，容乜易加劇社區傳播導致封城更頻密？雖則中央講明地區不能動不動就封城停課，但實際地方政府點去執行，有幾擔心走漏感染者而烏紗不保，尚待觀察。再者內房支持措施，之前唔出依家嚟出，會否係預示有更大嘅風險，亦未可知。
可以預期，股市反彈之路繼續崎嶇滿途，直至上述事件更明朗化。但永恆定律係股市唔會長期下跌，總會有上升周期，亦話唔埋已開始。所以有KOL話港股已完，未免太唔理性，若果上一個月內放曬啲貨，今日升市心情隨時慘過跌市。然而估底往往係不可能任務。所以分段買入，仍然係最佳選擇。
3132：追逐回勇芯片股
幾星期前介紹過喺十月跌浪中其中一個生還者醫藥股。嚟到十一月，醫藥板塊仍然獨佔鰲頭，但原來仲有半導體股緊隨其後。
所謂半導體，其實又可以理解為電子晶片或芯片。半導體用途廣泛，唔單單電腦或手機需要佢，連電動車、醫療設備、家電、遊戲機等都用到。有資料更加顯示，半導體係目前環球經濟中增長最快嘅行業之一。然而美國拜登政府對半導體技術出口至中國實施新限制後，多隻重磅股都曾於上月重創，但時至今日已經反彈唔少。
三星彭博環球半導體ETF（HKG:3132）投資全球多個地區上市嘅主要收入來源自半導體嘅企業，涉及美國、亞洲及歐洲投資於環球半導體的公司，覆蓋半導體上遊及下遊行業。發行商聲稱基金為亞洲第一隻環球半導體ETF。
ETF追蹤彭博環球半導體20大指數，包括台積電、英偉達NVIDIA、英特爾、三星等二十間最大型嘅半導體公司，前兩間公司佔成份達36%。
表現方面，過去一個月升21%，喺一眾醫藥股及一隻韓國ETF外表現最佳。值得留意過去三年中有兩年都係香港上市港元實貨ETF中表現最好，達39-50%升幅。基金管理費0.85%，但相對基金波動性而言，算係微不足道。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com