平民投資教室 - 錢俊 2023年3月21日
【平民投資教室】錢俊：雷曼時刻為時尚早
平民投資教室
日期：2023-03-21
更新時間：13:50:54
上周環球股市坐過山車。以為矽谷銀行倒閉不足為患，點知歐資大行瑞士信貸陷入違約風險，股價一日大跌20%，同時環球大小銀行股亦風聲鶴唳，最後要瑞士央行出手借錢兼迫婚，要與瑞士銀行合併收場。
今次瑞信危機會否與2008年雷曼時刻無限接近？暫時睇嚟就未必。正如上周提及，各國監管機構對大型金融機構嘅系統性風險要求極高，能夠做到生意嘅難度應該比倒閉更加難，最多就好似今次事件咁用應急可轉債套現做嫁妝。若下周美國聯儲局果真暫緩加息，銀行股風暴或有望暫告一段落。
另外，矽銀及瑞信兩次危機，市場未至於兵敗如山倒。除咗港美股市未有類似過去兩年單日跌超過5%嘅情況，反映投資者恐慌情緒嘅VIX波動指數最高都只到近30點，相對去年多次升穿30以及2020年爆疫情時升穿60仍有距離。美股標指亦仍高於年初水平。
更重要嘅係，悲觀情緒似乎只係留喺唔健康嘅金融機構身上。反映新經濟及科技股嘅納指上周竟然升3.5%，距離今年初高位只係差4%；同時恆生科指上周亦升5.6%。亦即係話資金只係輪動到另一板塊，而唔係整個市場出現系統性問題或火燒連環船嘅狀況。
錢俊年初亦提及，今年中港股或比美股好景，中國兩會完結不足一周就宣佈下調存款準備金率放水。相比加緊息嘅美國，中國銀根較鬆之餘，受歐美銀行業拖累嘅影響亦更細，若果市場未有進一步急速惡化，資金輪動到值搏率更大市場嘅情況可能提速，中期有利中港股票。
2826：衝上「雲」霄
有跟開錢俊嘅讀者或者都知道，港股ETF市場嘅選擇較美股ETF市場狹窄，然而有一個範疇嘅ETF選擇完勝，就係中資科技股相關嘅ETF，無論專注大型科技股定係涉足細價股，或者唔同科技股嘅細分市場，總有一隻ETF啱心水。
例如Global X 中國雲端運算ETF（HKG:2826），就係投資以雲端科技為主要業務嘅相關中資公司，呢方面包括活躍於數據中心、雲端服務、軟件即服務 （SaaS）、平台即服務 （PaaS） ，及基礎設施即服務 （IaaS） 嘅企業。而且投資嘅市場唔限於港股，亦包括海外如美國上市及A股上市嘅中資公司。
由於基金投資嘅行業較為專門，成份股都唔算多，只有31隻，十大成份股除咗騰訊、阿里巴巴同網易外，亦有紐約上市嘅具殼找房、深圳上市嘅科大訊飛等。一手入場價只係300蚊港幣左右，管理費約0.7%。
表現方面，單係上周就升咗14%，為實貨ETF之冠。當然，投資單一板塊自然有過度集中嘅風險，過去兩年監管風暴同外國制裁呢啲情況各位應該唔想再提，而基金過去三年總回報仍蝕23%。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com