銀行危機令加息預期降溫，上月以嚟金價扶搖直上。
上月爆發嘅銀行危機，一方面令市場避險情緒升溫，另一方面令市場對美國聯儲局持續加息預期降溫。事實上，喺銀行連環爆煲，業界可能進一步收緊貸款下，美國財長耶倫周日亦喺《CNN》節目中表示，「that could be a substitut
e for further interest rate hikes that the Fed needs to make」。憧憬信貸收縮抵銷儲局加息，利率期貨顯示，市場押注下月加息0.25厘機會近九成，而且預計係本輪加息周期最後一次。
美股外幣即時報價 多國新聞任睇
銀行係百業之母，信貸收縮會否令經濟衰退風險增加？市場預期美國下半年可能陷入溫和衰退，並促使利率加快回落。至於信貸收縮是耶非耶，睇美國四大銀行——摩通、美銀、花旗、富國首季業績，收入同盈利都好過預期，反映銀行危機集中喺地區性中小型銀行，而中小型銀行嘅存款貸款反而轉向大型銀行，大型銀行幾乎睇唔到信貸放緩。此外，美國金融系統早已更依賴直接融資，而非銀行間接融資，就算銀行收緊貸款，仍可倚靠債市股市。
黃金ETF 跟足金價走勢
銀行危機令加息預期降溫，上月以嚟金價扶搖直上，紐約期金上周四收每盎司2,055.3美元，逼近2020年8月6日嘅收市高位2,069.4美元同翌日嘅歷史高位2,075美元，之後回順，隔晚收2,019.7美元。金價上個升浪係上年2月俄烏開戰時，3月上旬升至2,000美元水平，之後反覆跌至10月下旬1,600美元水平，打仗持續，但冇令黃金成為資金避難所，反令資源價格上升，全球通脹加劇。通脹本來利好金價，因黃金可保值，但通脹導致央行加息則利淡金價，因黃金冇利息。
市場預期儲局下月再加一口息就收手，金價可望再上，若想投資黃金，買實金、金礦股，抑或黃金ETF較好？買實金如金條、金粒，需要儲存，放喺保險箱都涉及成本，買金礦股或黃金ETF則較簡單。先講黃金ETF，ETF係喺交易所買賣嘅基金，買賣都好方便，現時港交所（388）已有幾隻黃金ETF掛牌，例如SPDR金ETF（2840）、價值黃金ETF（3081）。黃金ETF嘅運作同盈富基金（2800）相似，盈富基金嘅走勢跟足恒生指數，黃金ETF嘅走勢則跟足金價。
買金礦股 如同槓桿金價
至於金礦股，金礦股出產黃金等有色金屬，金價升時所出產嘅黃金價值亦升，反之亦然。金礦股表現如同槓桿金價，假設金價為每盎司2,000美元，開採成本為1,100美元，利潤為900美元，當金價升10%至2,200美元，利潤由900美元升至1,100美元，升幅為22.2%，反之亦然，即該礦企利潤同金價有2.22倍槓桿。要注意係：①各金礦開採成本唔同，槓桿情況有別；②各金礦股黃金出產佔收入比重唔同，例如山東黃金（1787）幾乎全部收入嚟自黃金出產，紫金礦業（2899）則不足一半。
咁揀黃金ETF好，定揀金礦股好？呢樣就要視乎閣下嘅投資目的而定。如果你係追求資產避險或對沖風險，咁投資組合應有一定比例嘅黃金ETF，以平衡風險；如果你係追求回報，則可揀金礦股，因金礦股表現如同槓桿金價，當金價走強，金礦股表現更強，比金價升幅更大，但要注意回報越大、風險亦會越大。
割柑人
www.fb.com/hkstockpicker
本欄逢周四刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com