【平民投資教室】錢俊：港股派息嬴美股幾條街
平民投資教室
日期：2023-04-25
更新時間：09:21:06
上周提到高息股ETF。事實上，基於現時香港上市公司都以中資為主，港資為副，而好似微軟、可口可樂等廣泛覆蓋全球業務嘅公司實在寥寥可數，加上香港投資者都係炒港股為主，因此香港
高息股ETF都係投資中港股票。若果投資者希望收息時又想分散投資，就要考慮美股市場。
美股ETF市場種類遠較香港市場廣闊，可以揀投資美國、歐洲甚至全球股票嘅高息股，又或者房地產信託ETF等。
然而，投資美國ETF收息有兩大問題。首先，一般美股公司派息都比較手緊，以美股道指計，息率只有1.9%，比港股恆指3.3%低。好多所謂高息股都只派得3-4%，對比現時接近無風險嘅美國10年國債息率都有3.6%時，感覺有點雞肋。
其次，買美股或ETF收息的話，投資者需繳股息嘅30%，會於派息直接扣除。因此令美股公司及投資者更為傾向股本回購多於派息。相反，由於香港不設股息稅，而投資者又鍾意有錢落袋，派息成為公司高層重要考慮，因此買香港高息股收息較為吸引。
但凡事唔單單睇派息。美股喺風險與回報平衡及長遠總回報上，都比中港股優秀。因此宜買曬兩邊，包括考慮以美股為核心，再配以港股提高投資組合派息，以平衡風險、資本回報同派息三方面。
SCHD：聚焦高品質派息股
美股眾多高息股ETF中，美國嘉信理財Schwab US Dividend Equity ETF（US:SCHD）採用一般指數以外嘅揀股方法。基金會選取有長期穩定派息記錄嘅公司。投機成份較高嘅細價股因著股價低迷而提供數字上有吸引力嘅派息，但基金將會將佢哋排除在外。基金亦考慮多項指標，包括股息增長及股息收益率，從而令投資組合與大市相比有顯著高品質及穩定嘅派息。
基金嘅投資組合都係比較平均多元化。有別於香港主要高息股以金融及能源為核心，SCHD成份股16%為醫療科技、15%為電子科技，金融及非必需消費品各有13%。由於能源及金融股屬於周期性行業，市好嗰陣派息當然顯著，但市差就隨時供股都有你份。多元及有穩定派息嘅ETF係長期持有嘅核心投資組合嘅理想條件。
表現方面，過去五年累升近50%，優於美股道指嘅39%，同期恆指仍潛水34%。計埋每年派息約3.6%，算係幾吸引嘅投資。雖然派息被股息稅扣起唔少，但ETF勝在管理費低廉，只係0.06%，相比港股好多ETF收近0.6%。若果你用嘉信理財戶口買賣該基金，交易更加免傭金，可以多除少補。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com