【平民投資教室】錢俊：美國細價股點買法
平民投資教室
日期：2023-06-27
更新時間：11:19:35
上周美國股市雖然有所回軟，但仍然企得比港股硬淨。然而每次升得咁上下，就會有投資者開始話美股升勢已近尾聲。投資者亦會開始尋找其他仍有上漲空間嘅投資。然而亞洲及中港股票仍未有起色
，要尋寶仲可以喺邊度搵？
投資股票除咗跨地域外，亦可以深入更細市值或無咁出名嘅公司尋找投資機會。上年亦有提過細價股投資，然而香港細價股交投甚少，好多時因為市場消息而俾人舞高弄低。相比之下，美國細價股市場深度及交投量就大得多。
同買其他市場股票一樣，其實買細價股亦有分散投資作用。細價股ETF嘅走向與一般指數ETF關連度會低一啲，因為買一般指數ETF通常都係以大型股嘅表現主導。
另外有細價股愛好者認為，唔少細價股有長遠投資價值。已經好出名嘅公司股票，大把基金或投行去研究盤生意，時刻都出一堆報告俾人睇。有咩做得好做得唔好，股價都已經反映一切。反而名不經傳嘅公司，街上研究報告少，投資者走漏眼機會大，當佢潛力開始被人發現，你就執到寶。
CALF：投資高現金流優質細價股
美國上市嘅股細價股ETF選擇當然好多，之前介紹過最多人買嘅iShares Russell 2000 ETF（US:IWM）。然而指數投資成二千間公司，最大成份股都只係佔投資唔到0.4%，當然好處係分散風險，但就算當中買到未來股王，因為佔比太少，投資都好難賺到好多。加上ETF為被動投資，單以公司市值去揀股，難相應精準地買入優質股。
喺一般大型指數以外，亦有啲用唔同數據去揀細價股嘅ETF。比如Pacer US Small Cap Cash Cows 100 ETF（US:CALF）。基金主要以公司嘅自由現金流去揀股。自由現金流愈高嘅公司，有一定穩健嘅資產負債表，有好嘅營運收入等等，理論上公司應該係比較有質素嘅股票。
基金主要喺S&P細價股600指數上開始揀，以公司自由現金流高低去揀100隻股票及決定投資多少。另外每隻股票最多持股唔超過基金2%，以確保基金仍然有效分散投資。
表現方面，CALF今年回報為9%，比追蹤Russell 2000嘅IWM嘅5.8%好。雖然前者管理費為0.59%，比後者0.19%貴，但回報上都抵銷到，而且仍然比好多主動投資嘅ETF略平。當然，相比今年大價股表現，如標指嘅13%及30%有一段距離，但如果怕高追但又想專注於投資美股，都不失為一個選擇。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com