【平民投資教室】錢俊：2023第三季看點
平民投資教室
日期：2023-07-11
更新時間：09:40:04
2023上半年係咁先。最終今年暫時美國納指及日本日經指數以近30%升幅跑嬴，年初被各人睇好嘅中港股票繼續負數。
預期下一季，有三大因素影響大市氣氛。第一係中美關係。早前美國
國務卿訪華，各人以為中美關係有望緩和，之後拜登又話人獨裁者。嚟緊關係會否有變值得觀察，包括美國財長耶倫會否訪華，之後會否有更多商業上嘅放寬及合作；另外市場亦盛傳美國或再限制晶片出口，因此都要睇嚇會否有更多措施影響特別係科技行業嘅商業活動。呢個對全球科技股及中港股票氣氛有影響。
其次就係美國通脹情況。若果通脹居高不下，美國會否繼續有超乎市場預期嘅加息，例如加多0.75厘？除咗本地經濟，俄烏戰事及中東局勢對能源價格嘅影響，都直接與通脹掛鉤。
最後就係中國政策。過去半年，市場一直講中國有條件寬鬆及減息放水等等，但始終雷聲大雨點小。都係中港股票無以為繼，缺乏催化劑嘅原因。唔少投資者憧憬七月中共政治局開會，能否對經濟有更多支持嘅定調。
上述三個因素嘅結果都難以估計，只能話繼續分散投資，唔好買死一隻股市一個市場，方為上策。
3155：消費配合ESG揀股跑嬴大市
喺香港市場，投資中國股票嘅ETF好多，無論係投資個別行業還是A股H股。當中有兩個大主題好多基金經理都常常提及。
第一個係投資國內消費。有返國內或深圳嘅人或者體驗到國內餐飲業嘅服務愈趨高端，無論打邊爐有人幫你剝蝦殼，又或者上菜時更多整色整水環節，都突顯國內中產階層更願意俾錢獲得更好服務同產品。提供高端化服務及產品嘅公司不斷有空間發展。
另一個係ESG。國內達至碳中和嘅理想，又要減少汙染，無論綠色能源還是電動車等早前都成為投資者熱炒股票。
嘉實中國可持續生活科技主動型ETF（HKG:3155）就買曬呢個兩領域，投資於直接或間接參與提供生活科技產品或服務，且符合注重環境、社會及管治投資原則嘅公司。基金為主動型基金，由投資團隊揀股，因而管理費都較貴，接近1%，一手入場費約為2000蚊。
成份方面，主要為非消費必須品股，佔4成，其次為佔超過四分一嘅資訊科技。大家熟悉嘅阿里巴巴、騰訊、小米、京東都為十大持股之一，另外基金都有投資A股，包括有深圳股王、電池製造商寧德時代等。
表現方面，年初至今升1.6%，跑嬴港股恆指同恆生科指嘅負數。然而今年經濟復甦力度仍有待改善，同時相對於今年熱炒AI股，仍有所落後。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com