未來世界人口，除咗人類人口，可能仲要計及機械人人口，大家要有心理準備同robot一齊生活！ (imaginima via Getty Images)
上世紀中葉，機械取代低技術人力；如今，AI（Artificial Intelligence，人工智能）取代高技術人力。隨著全球人口老
齡化、少子化，人，將會愈嚟愈少；機械人／人形機械人，則會愈嚟愈多。未來世界人口，除咗人類人口，可能仲要計及機械人人口，大家要有心理準備同robot一齊生活！近年唔少網頁都設有「我不是機械人」驗證程序，過關方可登入，或者將來筆者都要喺篇文claim「not by AI」。
美股外幣即時報價 多國新聞任睇
ChatGPT爆紅 推動AI應用
呢趟AI革命，係第四次工業革命。第一次工業革命始於17世紀中葉，蒸汽機發明，火車輪船出現，加快貨物流通；第二次工業革命始於18世紀中葉，電力發明，電燈出現，規模生產令產品平均成本降低；第三次工業革命始於20世紀中葉，電腦應用迅速發展，協助人力進行生產；第四次工業革命以2022年11月OpenAI推出聊天機器人ChatGPT爆紅為標誌，ChatGPT嘅技術推動各行各業開發AI應用。
AI並非新鮮事物，上世紀末葉，隨著電腦應用普及，數碼化革命出現，AI開始喺製造、醫療、教育等行業露頭角，及至ChatGPT浪潮席捲全球，AI概念受到市場追捧，相關股份炒起。上周二，AI晶片龍頭Nvidia（NVDA）市值超越Microsoft（MSFT）、Apple（AAPL），成為全球市值最大公司。該股股價上年已升2.4倍，今年以嚟再升1.6倍；若由1999年上市起計，連同股息再投資，回報更達5,910倍！
廣告
Nvidia係以開發圖形處理器（GPU）、中央處理器（CPU）為主嘅半導體公司，由於生成式AI同產業普遍由CPU轉移GPU，尤其喺訓練同運行大型語言模型如ChatGPT方面，所以GPU需求好高。喺AI晶片市場，Nvidia佔95%機器學習GPU市場份額，因此食正AI條水，登上股王寶座。AI產業鏈龐大，除咗上遊負責製造組成伺服器嘅晶片商如Nvidia、台積電（TSM），仲有中遊嘅電腦商如Apple、Dell（DELL）、下遊嘅軟件商如Microsoft、OpenAI。
早前摩根士丹利就發表報告，指2024年至2027年，全球AI數據中心嘅電力需求複合年增長率為18%。 (onlyyouqj via Getty Images)
AI發展食電 留意電力股
港股有冇AI槪念股？有，主要喺下遊，即軟件應用方面，包括聊天機器人、雲數據、大數據、演算法等，例如百度（9888.HK）、阿里巴巴（9988.HK）、商湯（0020.HK）分別推出聊天機械人「文心一言」、「通義千問」、「商量」；阿里上周五又喺阿里雲上海AI峰會推出首個「AI程序員」；同日，騰訊（700）大語言模型「騰訊混元」宣布DiT模型全面開源訓練代碼。至於上遊，有但唔多，例如中芯（981）；中遊都有，但亦唔多，例如聯想（992）。
上述股份隨著AI消息炒過幾轉，不如留意AI槪念摱車邊股份。AI發展需要高效運算同數據處理，既需要電力傳輸，又非常食電。早前摩根士丹利就發表報告，指2024年至2027年，全球AI數據中心嘅電力需求複合年增長率為18%；銅需求（電纜需要用銅）複合年增長率則為26%；麥肯錫亦發表報告，預計美國數據中心耗電量2030年達35GW，比2022年17GW翻倍。港股電力股中，華潤電力（0836.HK）盈利能力較同業好，據彭博綜合券商預測，潤電未來3年盈利複合年增長率為20.4%。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com