乜都5G - 古星輝 2024年8月12日
古星輝 - 無處不AI | 乜都5G
人工智能（AI）與雲端運算關係密切，須高速處理和分析海量數據及執行指令；在超高速、低時延的5G技術所推動下火熱發展，席捲全球，可謂無處不AI。以電訊業為例，我哋就率先喺唔同範疇應用有關技術，提高工作效率、客戶滿意度，以至節能及保護環境。
應用AI的先行者
喺網絡管理方面，我哋以AI實時監察5G網絡設備嘅數據用量變化，綜合分析日與夜、繁忙與非繁忙時間及地區網絡嘅使用情況，再因應實際需求快速配置網絡資源，保持網絡運作暢順。
人工智能透過機器學習不斷進步，更有助預測早期網絡設備故障，提示工程團隊及早識別潛在問題，未雨綢繆。以往工程人員要實地檢測，而家可遙距監測網絡運作，確保流動通訊服務穩定可靠。
年初，我哋仲採用咗人工智能節能方案，全天候管理及分析唔同地區嘅網絡使用情況，例如市區及偏遠地區基站於深夜嘅使用情況，喺低用量時自動調整網絡至智慧節能模式，既慳電又可以減排二氧化碳，實踐可持續發展嘅目標。
此外，我哋將人工智能應用於客戶服務，以提升效率及服務質素，並節省人力資源。使用AI聊天機械人，能迅速解答公司超過一半嘅客戶查詢，而且能做到答「是」所問，精準度可達八成。簡單又重複嘅問題，例如日常有關合約何時到期、月費多少等查詢，可由聊天機械人直接回應。至於要處理較複雜嘅查詢，就有賴加強對聊天機械人嘅訓練及調校。
無懼世事變改
有報道曾預測香港會成為全球最受AI影響嘅地區，而年初又有報告顯示，環球近四成工作將受AI影響，而喺先進國家，更會波及約六成工作，有人因此憂慮職位會被取替或者自己被AI淘汰。
其實依家就好似返到以往電腦未開始普及嘅時代，以前有「資料輸入」嘅職位，但時至今日，大部分人都識用電腦，巿場對呢啲職位嘅需求當然下降。
隨AI不斷發展，有助簡化工作流程、推動自動化，工種或職位演迭係自然不過嘅事。喺轉變嘅過程中，最重要學會迎難而上。面對AI，要經歷「想用但唔識用」、「唔識用所以唔用」嘅痛苦過程，但只要我哋提升自學能力，主動學習，加強人與機械溝通嘅能力，將有助掌握新技能，適應未來。
和記電訊香港執行董事及行政總裁
古星輝
乜都5G - 古星輝 舊文
本文作轉載及備份之用 來源 source: http://www.stheadline.com