內銀股連日急跌，不排除短線會出現技術反彈，圖為內地銀行職員。 (Yongyuan Dai via Getty Images)
喺市場搵食，有嘢落鑊炒先有得食。港股業績期，上周內地銀行股壓軸登場，焦點係首度派發或恢復派發中期股息。放榜前所見，資金一哄而上狂買內銀股，令到股價急升破頂，上
周二傍晚，更引嚟具官媒背景嘅《每日經濟新聞》發布評論文章《機構投資者，不應在四大行上抱團式投機》，指摘大戶炒作：「機構投資者的這種行為，不僅是戰略方面的問題，而且是以抱團爲名，行投機之實。」之後隨著放榜，就見資金一哄而散狂沽內銀股。
美股外幣即時報價 多國新聞任睇
息差收窄 利錢受壓
其實喺經濟前景不明下，資金尤其ETF資金，被「息誘」而投向內銀股懷抱防守，無可厚非；事實上，國家隊亦買入以內銀股為主嘅ETF托市。然而，內銀股放榜前喜氣洋洋，放榜後死氣沉沉，「死因」除咗官方喉舌指摘大戶抱團投機，最致命係——有政策跟尾！上周五，《彭博》引述知情人士爆料，中國考慮下調存量房貸利率，允許規模高達38萬億元人民幣嘅存量房貸尋求轉按揭，以降低居民債務負擔、提振消費。供樓者按揭利率下調，意味內銀股淨息差收窄，利錢受壓。資金此前已急沽，春江鴨乎？
睇返內銀股中期業績，雖然大多一如早前預告，首派或復派中期息，但股價不升反跌。首派中期息嘅有：工行（1398）、中行（3988）、農行（1288），以及郵儲行（1658）；復派中期息嘅有：建行（939，曾於2007-2008年派發）、交行（3328，曾於2008-2010年派發）、信行（998，曾於2011年派發）；招行（3968）則維持不派中期息。留意返，工、中、農、交、信嘅H股股東要到2025年初才能收息，建行未公布派送日期，郵儲行更未公布派送金額同日期。各間內銀嘅派息比率都係維持三成左右，有將末期息拆開畀中期息之嫌，亦係捱沽原因之一。
捨內銀股 取內需股
中期盈利方面，工、中、建、農、交、招、信、郵之中，只得農行錄得增長，按年增加2%，其餘各行則按年減少1.2%至1.9%；至於淨息差，全都收窄，分別跌29、23、25、21、2、23、8、17個基點。市場擔心息差繼續收窄損及盈利，內銀股連跌3日，上述內銀股價分別累跌6.1%、3%、5.5%、7%、10.2%、6.6%、8.9%、6.3%。銀行乃百業之母，對實體經濟讓利，係國家任務，一旦房貸減息政策落實，息差勢將收窄，盈利勢被蠶食，內銀股難逃再跌。工、中、建、招佔恒指比重近13%，工、中、建、農、交、招、郵佔國指比重更達21.7%，隨時拖大市後腿。
內銀股連日急跌，不排除短線會出現技術反彈，但喺政策陰霾下，難以寄望轉勢。內銀股向來被視為收息股選擇之一，但現時嚟講，要揀收息股，宜捨內銀股，取內需股，話曬如果房貸減息政策落實，人民供樓負擔減輕，可以用嚟消費嘅錢增加，自然有利內需股。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com